දිවයිනේ ප්රදේශ දෙකක සිදුවූ දරුණු මාරක රථවාහන අනතුරු දෙකකින් 21 හැවිරිදි තරුණයෙකු ඇතුළු පුද්ගලයන් දෙදෙනෙකු ජීවිතක්ෂයට පත්ව ඇති බව පොලිස් මාධ්ය ප්රකාශක කාර්යාලය පවසයි. මෙම අනතුරු දෙකම යතුරුපැදි පාලනය කරගත නොහැකි වීම සහ වෙනත් වාහනවල ගැටීම හේතුවෙන් සිදුව තිබේ.
පළමු අනතුර වාර්තා වන්නේ කොළඹ, ග්රෑන්ඩ්පාස් පොලිස් වසමෙනි. තොටලඟ හන්දිය දෙස සිට පෑළියගොඩ දෙසට අධික වේගයෙන් ධාවනය වූ යතුරුපැදියක්, ග්රෑන්ඩ්පාස් ලූකස් පාර හන්දිය අසලදී ඉදිරියෙන් ධාවනය වූ ප්රයිමූවර් (Prime mover) බර වාහනයක ගැටීමෙන් මෙම අනතුර සිදුව ඇත. අනතුරින් බරපතළ තුවාල ලැබූ යතුරුපැදිකරු වහාම කොළඹ ජාතික රෝහලට ඇතුළත් කර ඇති අතර, එහිදී ඔහු මියගොස් තිබේ. මෙලෙස අවාසනාවන්ත ලෙස මියගොස් ඇත්තේ පෑළියගොඩ ප්රදේශයේ පදිංචිව සිටි 21 හැවිරිදි තරුණයෙකි. අනතුරට සම්බන්ධ ප්රයිමූවර් රථයේ රියැදුරු ග්රෑන්ඩ්පාස් පොලිසිය විසින් අත්අඩංගුවට ගෙන ඇත.
දෙවන මාරක අනතුර පයාගල ප්රදේශයෙන් වාර්තා වන අතර, පොලිසිය පවසන පරිදි එහි පසුබිම මෙසේය.
“පයාගල, මලේගොඩ දොඩංගොඩ මාර්ගයේ පහල අංගොඩ හන්දිය අසලදී දොඩංගොඩ දෙසට ධාවනය වූ යතුරුපැදියක්, එම දිශාවටම ඉදිරියෙන් ගමන් කළ පාපැදියක පිටුපසින් තදින් ගැටී තිබෙනවා. අනතුරෙන් පාපැදිකරු සහ යතුරුපැදිකරු යන දෙදෙනාම බරපතළ තුවාල ලබා කළුතර, නාගොඩ ශික්ෂණ රෝහලට ඇතුළත් කිරීමටයි ප්රදේශවාසීන් පියවර ගෙන තිබුණේ. කෙසේ වෙතත් රෝහලට ඇතුළත් කිරීමෙන් පසු එහි ප්රතිකාර ලබමින් සිටි යතුරුපැදිකරු ජීවිතක්ෂයට පත්ව තිබෙනවා.”
මෙම අනතුරින් මියගොස් ඇත්තේ පයාගල ප්රදේශයේම පදිංචිකරුවෙකු වන 43 හැවිරිදි පුද්ගලයෙකි. අනතුර සම්බන්ධයෙන් පයාගල පොලිස් ස්ථානයේ රථවාහන අංශයේ නිලධාරීන් විසින් වැඩිදුර විමර්ශන කටයුතු සිදුකරනු ලබයි.
