ප්රතිකාර සඳහා කොළඹ ජාතික රෝහලට ඇතුළත් කර සිටින රාජ්ය බුද්ධි සේවයේ හිටපු ප්රධානී සුරේෂ් සලේ මහතා තවදුරටත් ආහාර වර්ජනයක නිරතව සිටින බව වාර්තා වේ. ඊයේ (08) සිය ඥාතීන් සහ නීතිඥවරුන් හමුවූ අවස්ථාවේදී ඔහු මේ බව තහවුරු කර තිබේ.
තම උපවාසය අවසන් කිරීම සඳහා ඔහු ප්රධාන කොන්දේසි දෙකක් ඉදිරිපත් කර ඇත. තමන් සම්බන්ධයෙන් සිදුකරන විමර්ශනවලින් අපරාධ පරීක්ෂණ දෙපාර්තමේන්තුවේ අධ්යක්ෂවරයා ඉවත් කිරීම සහ තමන් දැනට රඳවා සිටින ස්ථානය වෙනස් කිරීම ඔහුගේ ඉල්ලීම් වේ.
මේ අතර, සුරේෂ් සලේ මහතාට සලකන ආකාරයට විරෝධය පළ කරමින් විපක්ෂයේ දේශපාලන පක්ෂ කිහිපයක් විසින් ආරම්භ කර ඇති සත්යග්රහය කොළඹ කොටුව දුම්රියපොළ ඉදිරිපිටදී තවදුරටත් ක්රියාත්මක වේ. පිවිතුරු හෙළ උරුමයේ නායක උදය ගම්මන්පිල මහතා සහ සර්වජන බලයේ උප සභාපතිනි අනුරාධා යහම්පත් මහත්මිය ඇතුළු පිරිසක් මෙම සත්යග්රහයට එක්ව සිටින අතර, සලේ මහතාව නිදහස් කරන තෙක් මෙම විරෝධතාව නතර නොකරන බව ඔවුහු අවධාරණය කරති.
මෙම සිද්ධිය සම්බන්ධයෙන් අදහස් දක්වමින් ජාතික ජන බලවේගයේ පාර්ලිමේන්තු මන්ත්රී චන්දන සූරියආරච්චි මහතා පවසන්නේ, මෙය අධිකරණයට යටත් කාරණයක් වන බැවින් කිසිවෙකු කලබල විය යුතු නැති බවයි. ආණ්ඩුව කිසිවෙකු සම්බන්ධයෙන් වෛරයෙන් කටයුතු නොකරන බවත්, අධිකරණය මගින් නීත්යානුකූලව මෙම ගැටලුව විසඳනු ඇති බවත් ඔහු වැඩිදුරටත් පැවසීය.
