ප්රධාන නගර සංවර්ධන වැඩසටහන යටතේ ක්රියාත්මක ‘ගාල්ල නගර සංවර්ධන ව්යාපෘතිය’ කඩිනම් කිරීම පිළිබඳ විශේෂ සාකච්ඡාවක් ජනාධිපති අනුර කුමාර දිසානායක මහතාගේ ප්රධානත්වයෙන් අද (10) පස්වරුවේ ජනාධිපති කාර්යාලයේදී පැවැත්විණි. ලෝක උරුමයක් වන ගාල්ල නගරය සංස්කෘතික සහ සංචාරක පුරවරයක් ලෙස සංවර්ධනය කිරීමේ වැඩසටහන්වල ප්රගතිය මෙන්ම ඊට මතුව ඇති ගැටලුවලට ලබාදිය හැකි විසඳුම් පිළිබඳව ද මෙහිදී දීර්ඝ ලෙස සමාලෝචනය කෙරිණි.
මෙම සැලැස්ම යටතේ ගාල්ල නගර මධ්යයේ සහ ගාලු කොටුව තුළ පවතින පොලිස් ස්ථානය, තැපැල් කාර්යාලය, බන්ධනාගාරය සහ හෙද පුහුණු පාසල වෙනත් ස්ථානවල ස්ථාපිත කිරීම සඳහා අවශ්ය ඉඩම් නිදහස් කර ගැනීම පිළිබඳව විශේෂ අවධානයක් යොමු විය. එමෙන්ම ජනතාවට වඩාත් පහසුවෙන් සේවා ලබාගත හැකි වන පරිදි ගාල්ල නගරයේ සියලුම රජයේ කාර්යාල එක් පරිපාලන සංකීර්ණ ගොඩනැගිල්ලක් වෙත ගෙන ඒමට ද, දැනට පවතින සෞන්දර්ය පාසල සංවර්ධනය කිරීමට ද මෙහිදී සාකච්ඡා කෙරිණි.
විධිමත් නගර සැලැස්මක් තුළ ගාල්ල නගරය සංවර්ධනය කිරීමේ අවශ්යතාව පෙන්වා දුන් ජනාධිපතිවරයා, රාජ්ය ආයතන ගාල්ල කොටුවෙන් පිටත ස්ථාපනය, ගොඩනැගිලි හා මාර්ග ඇතුළු යටිතල පහසුකම් ඉදිකිරීමේදී සියලුම රාජ්ය ආයතන ඒකාබද්ධව කටයුතු කිරීමේ වැදගත්කම අවධාරණය කළේය. එහිදී භූමිය උපරිම ඵලදායීතාවකින් යුතුව යොදා ගැනීම සඳහා නාගරික සංවර්ධන අධිකාරියට (UDA) සුවිශේෂී වගකීමක් පැවරෙන බව ද ජනාධිපතිවරයා ප්රකාශ කළේය.
ගාලු කොටුව සහ ඒ ආශ්රිත මුහුදු තීරය ලෝක මට්ටමේ සංචාරක ආකර්ෂණයක් දිනාගත් කලාපයක් ලෙස ප්රවර්ධනය කිරීම පිළිබඳව පුළුල් ලෙස සාකච්ඡා වූ අතර, මෙම නව ඉදිකිරීම් සහ සංවර්ධන කටයුතු සඳහා දේශීය හා විදේශීය ආයෝජන ගෙන්වා ගැනීම මෙන්ම ප්රතිපාදන වෙන් කර ගැනීම කෙරෙහි ද අවධානය යොමු විය.
