දුම්කොළ වගාව, සිගරට් නිෂ්පාදනය, බෙදාහැරීම සහ ඉන් බැහැර කෙරෙන පශ්චාත්-පාරිභෝගික අපද්රව්ය (Post-consumer Waste) හේතුවෙන් මිනිස් සිරුරට පමණක් නොව සමස්ත ගෝලීය පරිසර පද්ධතියටම සිදුවන බරපතල විනාශය වහාම නතර කිරීමට පියවර ගන්නා ලෙස ලෝක සෞඛ්ය සංවිධානය (WHO) සහ එක්සත් ජාතීන්ගේ පරිසර වැඩසටහන (UNEP) ලෝකවාසී රජයන්ගෙන් සහ මහජනතාවගෙන් හදිසි ඉල්ලීමක් කර සිටියි. දුම්කොළ භාවිතය හේතුවෙන් වාර්ෂිකව මිලියන 8කට අධික මිනිස් ජීවිත සංඛ්යාවක් ලොවට අහිමි වන අතර, ඊට සමාන්තරව පෘථිවියේ දැනට ඉතිරිව ඇති සීමිත සම්පත් සහ බිඳෙනසුලු පරිසර පද්ධතීන් මත මෙමඟින් එල්ල කෙරෙන පීඩනය දිනෙන් දින ඉහළ යමින් පවතින බව එම සංවිධාන ඒකාබද්ධ නිවේදනයක් නිකුත් කරමින් අවධාරණය කරයි. සිගරට් නිෂ්පාදනය සහ භාවිතය නිසා අපේ ජලය, පස, වෙරළ තීරයන් සහ නගර වීදි රසායනික ද්රව්ය, විෂ සහිත අපද්රව්ය, ක්ෂුද්ර ප්ලාස්ටික් (Microplastics) අඩංගු සිගරට් කොට මෙන්ම විද්යුත් සිගරට් (E-cigarette) අපද්රව්යවලින් දරුණු ලෙස දූෂණය වෙමින් පවතී.
ගෝලීය පරිසර දත්තයන්ට අනුව, සිගරට් නිෂ්පාදනය වෙනුවෙන් පමණක් වසරකට ගස්, මිලියන 600ක් කපා විනාශ කෙරෙන අතර, වාතයට මුදාහැරෙන කාබන් ඩයොක්සයිඩ් (CO2) ප්රමාණය ටොන් මිලියන 84ක් දක්වා අතිදැවැන්ත වේ. මෙමඟින් ගෝලීය උෂ්ණත්වය ඉහළ යාම සහ දේශගුණික විපර්යාසයන් සීග්ර වී ඇති අතර, සිගරට් නිපදවීම සඳහා පමණක් වසරකට පිරිසිදු ජලය ලීටර් බිලියන 22ක් නාස්ති කර දමයි. මෙවැනි දරුණු පාරිසරික විනාශයක් සිදුකරන දුම්කොළ කර්මාන්තය, තමන් පරිසර හිතකාමී සහ තිරසාර ව්යාපාරයක් ලෙස පෙන්වීමට “ග්රීන්වොෂිං” (Greenwashing) නැමැති සූක්ෂ්ම සහ වංචනික උපක්රම භාවිත කරමින් සිය සැබෑ හානිකර ස්වරූපය වසා ගැනීමට උත්සාහ කරන බව ද පරිසර විද්යාඥයෝ පෙන්වා දෙති.
දුම්කොළ වගාව වෙනුවෙන් පමණක් සෑම වසරකම හෙක්ටයාර් මිලියන 3.5ක වටිනා භූමි ප්රමාණයක් මුළුමනින්ම විනාශ කෙරෙන අතර, මෙමඟින් සංවර්ධනය වෙමින් පවතින රටවල මහා පරිමාණයෙන් වනාන්තර විනාශ වීම (Deforestation) සහ පස නිසරු වීම (Soil Degradation) සිදු වේ. ලෝක දුම්කොළ නිෂ්පාදනයෙන් 90%ක්ම සංවර්ධනය වෙමින් පවතින දුප්පත් රටවල් කේන්ද්ර කරගනිමින් සිදු කෙරෙන අතර, කෙටිකාලීන මූල්ය ලාභ අපේක්ෂාවෙන් දුම්කොළ වගා කරන ගොවීන්ට දිගුකාලීනව ඉතිරි වන්නේ දැඩි ආහාර අනාරක්ෂිතතාව, සුව කළ නොහැකි රෝගාබාධ, සදාකාලික ණයගැතිභාවය සහ දරුණු දරිද්රතාවය පමණි. මේ හේතුවෙන් 2030 වසර වන විට ගෝලීය දුම්කොළ භාවිතය 30%කින් පහත හෙළීම සඳහා ලෝක සෞඛ්ය සංවිධානයේ දුම්කොළ පාලනය පිළිබඳ ප්රඥප්තිය (WHO FCTC) රටවල් තුළ කඩිනමින් සහ දැඩි ලෙස ක්රියාත්මක කළ යුතු බව UNEP සහ WHO සංවිධාන වැඩිදුරටත් අවධාරණය කර සිටියි.
