ශ්රී ලංකාවේ ඉහළම අධිකරණ පද්ධතිය වන ශ්රේෂ්ඨාධිකරණයේ සහ අභියාචනාධිකරණයේ විනිසුරු ධුර අටක් (08) මාස හයකට ආසන්න දීර්ඝ කාලයක සිට පුරවා නොමැති බවත්, මෙය මෙරට අධිකරණ ඉතිහාසයේ නොවූ විරූ බරපතල ප්රමාදයක් බවටත් හිටපු පාර්ලිමේන්තු මන්ත්රී අජිත් පී. පෙරේරා මහතා සෘජුවම චෝදනා කරයි. “අද වෙනකොට ශ්රේෂ්ඨාධිකරණය සහ අභියාචනාධිකරණයේ ධූර අටක් හිස්ව තිබෙනවා. මේ පුරප්පාඩු මාස හයක් විතර තිස්සේ පුරවන්නේ නැහැ” යැයි ඒ මහතා ප්රකාශ කළේය.
ඉහළ අධිකරණවලට අමතරව මහාධිකරණයේ ද දැනට විනිසුරු පුරප්පාඩු රැසක් පවතින බව අනාවරණය වේ. මෙම පත්වීම් දිගින් දිගටම පැහැර හැරීම සහ ප්රමාද කිරීම හේතුවෙන් නීතිපති දෙපාර්තමේන්තුවේ වෘත්තීය මට්ටමින් සේවය කරන ජ්යෙෂ්ඨ නීතිඥවරුන්ගේ වෘත්තීය ප්රගතියට (Career Progression) සහ උසස්වීම්වලට බරපතල බාධා එල්ල වී ඇති බව පෙන්වා දෙනු ලබයි.
රටේ සමස්ත යුක්තිය පසඳලීමේ යාන්ත්රණය සහ අධිකරණ ක්රියාවලිය දෛනිකව ප්රමාද වීම සඳහා, වගකිවයුතු පාර්ශවයන් විසින් මෙම ඉහළ විනිසුරු පත්වීම් කඩිනමින් සිදු නොකිරීම සෘජුවම බලපා ඇති බව ද, මේ හරහා සමස්ත අධිකරණ ස්වාධීනත්වය මෙන්ම පොදු මහජනතාවගේ නීතිමය අයිතිවාසිකම් ද දැඩි ලෙස උල්ලංඝනය වන බව ද නීති ක්ෂේත්රයේ ප්රවීණයෝ වැඩිදුරටත් අනාවරණය කරති.
