ත්රස්තවාදය වැළැක්වීමේ පනත යටතේ අපරාධ පරීක්ෂණ දෙපාර්තමේන්තුවේ (CID) රැඳවුම් භාරයේ පසුවන, රාජ්ය බුද්ධි සේවයේ හිටපු ප්රධානී විශ්රාමික මේජර් ජෙනරාල් සුරේෂ් සලේ මහතා බැලීම සඳහා ඔහුගේ බිරිඳ සහ පුත්රයාට අවසර දෙන ලෙස කළ ඉල්ලීම කොටුව මහේස්ත්රාත් අධිකරණය විසින් ප්රතික්ෂේප කර තිබේ. පාස්කු ඉරුදින බෝම්බ ප්රහාර මාලාවට අදාළ විමර්ශන හේතුවෙන් රඳවාගෙන සිටින සලේ මහතා මේ වන විට කොළඹ ජාතික රෝහලේ නේවාසිකව ප්රතිකාර ලබයි.
රෝහලේ සාමාන්ය රෝගීන් බැලීමේ වේලාවන් තුළ ඔහුව හමුවීමට අවසර දෙන ලෙස සැකකරුගේ නීතිඥ මඩුල්ල ඉල්ලා සිටියද, කොටුව මහේස්ත්රාත් පසන් අමරසේන මහතා ප්රකාශ කළේ සැකකරු පසුවන්නේ ත්රස්තවාදය වැළැක්වීමේ පනතේ රැඳවුම් භාරයක බැවින් එවැනි නියෝගයක් නිකුත් කිරීමට තමන්ට නීතිමය ප්රතිපාදන නොමැති බවයි.
අධිකරණයෙන් මෙම සහනය අහිමි වීමත් සමඟ, සලේ මහතා දිනපතා බැහැදැකීමට අවස්ථාව සලසා දෙන ලෙස ඉල්ලා ඔහුගේ බිරිඳ සහ නීතිඥ අසිත් සිරිවර්ධන මහතා විසින් අපරාධ පරීක්ෂණ දෙපාර්තමේන්තුවේ අධ්යක්ෂ ශානි අබේසේකර මහතා වෙත සෘජුවම ලිඛිත ඉල්ලීම් ඉදිරිපත් කර තිබේ. මේ අතර, තමන්ව රඳවා තබා ගැනීමට නිකුත් කර ඇති නියෝගය බලරහිත කරන ලෙස ඉල්ලා සලේ මහතා ගොනු කළ රීට් පෙත්සම විභාග කිරීම අභියාචනාධිකරණය විසින් ලබන ජූලි මස 10 වනදා දක්වා කල් තබා ඇත.
