පාස්කු ඉරිදා ත්රස්ත ප්රහාරය සම්බන්ධයෙන් ඇමරිකානු FBI, ඕස්ට්රේලියානු ෆෙඩරල් පොලිසිය (AFP), ස්කොට්ලන්ඩ් යාඩ් සහ ඉන්ටර්පෝල් වැනි ජාත්යන්තර විමර්ශන ආයතන සොයාගත් කරුණුවලට අමතරව නව තොරතුරු මෙරට බලධාරීන් සොයාගෙන තිබේ නම්, වහාම ඒ බව එම ආයතනවලට දැනුම් දීමට ආණ්ඩුව කටයුතු කළ යුතු බව සර්වජන බලය පක්ෂයේ නායක, පාර්ලිමේන්තු මන්ත්රී දිලිත් ජයවීර මහතා ප්රකාශ කරයි. ස්වර්ණවාහිනී නාලිකාවේ ‘රතු ඉර’ දේශපාලන සංවාදයට එක්වෙමින් මන්ත්රීවරයා මේ බව අවධාරණය කළේය.
ජාත්යන්තර විමර්ශන ආයතන නිසැකවම ප්රකාශ කර ඇත්තේ පාස්කු ප්රහාරය මෙහෙයවනු ලැබුවේ ISIS සංවිධානයේ ශ්රී ලංකා ශාඛාව විසින් බවයි. එසේ තිබියදී, ආණ්ඩුව පවසන පරිදි මෙරට බුද්ධි අංශවල සහයෝගයක් මීට ලැබුණු බවට අලුත් සාක්ෂි තිබේ නම්, ඒවා ජාත්යන්තරයට හෙළි කළ යුතු බවත්, නැතහොත් ශ්රී ලංකාව ජාත්යන්තරය ඉදිරියේ විහිළුකාරයන් වනු ඇති බවත් ඔහු පෙන්වා දුන්නේය.
හිටපු රාජ්ය බුද්ධි අංශ ප්රධානී මේජර් ජනරාල් සුරේෂ් සලේ මහතා අත්අඩංගුවට ගැනීම සම්බන්ධයෙන් ද අදහස් දැක්වූ දිලිත් ජයවීර මහතා, එය “සාක්ෂි නිර්මාණය කිරීමේ” සැක සහිත ක්රියාවලියක් බවට චෝදනා කළේය. සලේ මහතා අත්අඩංගුවට ගෙන ඉදිරිපත් කළ මුල් ‘බී’ වාර්තාවේ අඩංගු නොවූ කරුණු, ඔහු රඳවා තබාගෙන ප්රශ්න කිරීමෙන් පසුව ඉදිරිපත් කිරීම ගැටලුසහගත බවත්, අදාළ කාලවකවානුවේදී සුරේෂ් සලේ මහතා මෙරට සේවය නොකළ පසුබිමක ඔහු හමුදා යාන්ත්රණය පාවිච්චි කර කුමන්ත්රණයක් කළේ යැයි පැවසීම තර්කානුකූල නොවන බවත් මන්ත්රීවරයා වැඩිදුරටත් කියා සිටියේය.
