උත්තරීතර අධිකරණවල විනිසුරුවරුන්ගේ විශ්රාම ගැන්වීමේ වයස ඉහළ නැංවීම සඳහා යෝජනා කර ඇති ආණ්ඩුක්රම ව්යවස්ථා සංශෝධනයට එරෙහිව ශ්රී ලංකා නීතිඥ සංගමය (BASL) ගෙන ඇති ස්ථාවරයට පොදුරාජ්ය මණ්ඩලීය නීතිඥ සංගමය (CLA) සිය පූර්ණ සහයෝගය පළ කර තිබේ. අදාළ ව්යවස්ථා සංශෝධන ක්රියාවලිය ඉදිරියට ගෙනයෑමෙන් වළකින ලෙස එම සංගමය ශ්රී ලංකා බලධාරීන්ගෙන් හදිසි ඉල්ලීමක් ද කරයි.
නිල ප්රකාශයක් නිකුත් කරමින් පොදුරාජ්ය මණ්ඩලීය නීතිඥ සංගමය පෙන්වා දෙන්නේ, ශ්රී ලංකා නීතිඥ සංගමය විසින් ජනාධිපති අනුර කුමාර දිසානායක මහතා වෙත ඉදිරිපත් කරන ලද කරුණු තමන් ද අනුමත කරන බවයි. අධිකරණ ක්ෂේත්රයට බලපාන ඕනෑම ව්යවස්ථා ප්රතිසංස්කරණයක් සිදු කළ යුත්තේ අදාළ පාර්ශ්වයන් සමඟ නිසි උපදෙස් හා පුළුල් සාකච්ඡා පැවැත්වීමෙන් අනතුරුව පමණක් බවත්, අධිකරණය කෙරෙහි මහජන විශ්වාසය පළුදු වන ආකාරයේ ක්රියාවන් නීතියේ ආධිපත්යයට පටහැනි බවත් ඔවුහු අවධාරණය කරති.
ශ්රේෂ්ඨාධිකරණයේ සහ අභියාචනාධිකරණයේ විනිසුරුවරුන්ගේ විශ්රාම වයස ඉහළ නැංවීමේ ව්යවස්ථා සංශෝධනය මඟින් අධිකරණයේ ස්වාධීනත්වයට සහ යුක්තිය පසිඳලීම කෙරෙහි මහජන විශ්වාසයට අහිතකර බලපෑම් ඇති විය හැකි බව BASL සංගමය මීට පෙර ජනාධිපතිවරයා වෙත ලිපියකින් පෙන්වා දී තිබුණි. එම තාර්කික ස්ථාවරය අගය කරන පොදුරාජ්ය මණ්ඩලීය නීතිඥ සංගමය, අධිකරණයේ ස්වාධීනත්වයට ආපසු හැරවිය නොහැකි හානි සිදු නොකරන ලෙස ලංකා රජයෙන් වැඩිදුරටත් ඉල්ලා සිටියි.
