පසුගිය සඳුදා (ජූනි 08) දකුණු පිලිපීනයේ මින්දනාඕ (Mindanao) කලාපයට බලපෑ මැග්නිටියුට් 7.8ක අති ප්රබල භූමිකම්පාවකින් අවම වශයෙන් පුද්ගලයන් 32 කු මියගොස් 200 කට වැඩි පිරිසක් තුවාල ලබා ඇති බව එරට ආපදා කළමනාකරණ නිලධාරීහු තහවුරු කරති. (පසුකාලීන නිල වාර්තාවලට අනුව මරණ සංඛ්යාව තවත් ඉහළ ගොස් තිබේ).
පිලිපීන භූ විද්යා ආයතනය සඳහන් කළේ මෙම භූකම්පනය එරට සරන්ගානි (Saratangani) ප්රදේශයට ඔබ්බෙන් වූ මුහුදේ කිලෝමීටර් 33ක් ගැඹුරින් හටගෙන ඇති බවයි. කම්පනය හේතුවෙන් ජෙනරාල් සැන්ටොස් (General Santos) නගරයේ ගොඩනැගිලි කිහිපයක් කඩා වැටී ඇති අතර, සරන්ගානි හි හටගත් දරුණු නායයෑම් හේතුවෙන් ගම්මාන රැසක් පස්වලට යටවී තිබේ.
මෙම ප්රබල භූකම්පනයත් සමඟ පිලිපීන වෙරළ තීරයට අඩි 3ක (මීටර් 1ක) පමණ සුනාමි රළ පහරක් (Tsunami waves) ද ගලා විත් ඇති අතර, බලධාරීන් විසින් වෙරළාශ්රිත ජනතාව වහාම ඉවත් කිරීමට පියවර ගෙන තිබුණි. මෙම භූ කම්පනයේ බලපෑම ඉන්දුනීසියාව, මැලේසියාව සහ ජපානය වැනි අසල්වැසි රටවලට ද දැනී ඇති අතර, ප්රධාන භූකම්පනයෙන් පසුව ප්රබල පසුකම්පන (Aftershocks) සිය ගණනක් ද වාර්තා වී ඇත.
