පසුගිය අප්රේල් මාසයේ පැවැති හංගේරියානු මහ මැතිවරණයෙන් (General Election) ලැබූ දරුණු පරාජය හමුවේ වුවද, එරට හිටපු අග්රාමාත්ය වික්ටර් ඕර්බන් (Viktor Orban) එරට ප්රධාන විපක්ෂය වන ෆිඩෙස් (Fidesz) පක්ෂයේ නායකයා ලෙස තවත් වසරක කාලයක් සඳහා ඒකමතිකව යළි තේරී පත්ව තිබේ.
හංගේරියාවේ රාජ්ය පුවත් ඒජන්සිය (MTI) වාර්තා කළේ සෙනසුරාදා පැවැති පක්ෂ මහා සම්මේලනයේදී නියෝජිතයන් 737 දෙනෙකු අතුරින් 729 දෙනෙකුගේම වැඩි ඡන්දයෙන් ඔහු මෙලෙස තේරී පත්වූ බවයි. මෙවර නායකත්ව තරගය සඳහා ඔහුට එරෙහිව වෙනත් කිසිදු අපේක්ෂකයෙකු ඉදිරිපත් වී නොතිබුණි.
2010 වසරේ සිට වසර 16ක් පුරා හංගේරියාව පාලනය කළ රුසියානු හිතවාදී (Pro-Russian) ඕර්බන්ගේ දේශපාලන අනාගතය, පසුගිය අප්රේල් 12 වැනිදා පැවැති මැතිවරණ පරාජයත් සමඟ දැඩි අවදානමකට ලක්ව තිබුණි. බටහිර හිතවාදී පීටර් මාග්යර් (Peter Magyar) ගේ ‘ටිස්සා’ (Tisza) පක්ෂය හමුවේ ලැබූ මෙම පරාජයේ සම්පූර්ණ වගකීම තමන් භාරගන්නා බව පැවසූ ඕර්බන්, පක්ෂය අමතමින් මෙසේද කියා සිටියේය:
“මම කිසිවිටෙකත්, කිසිම දවසක පරාජය පිළිගෙන දේශපාලනයෙන් සමුගන්නේ නැහැ. ෆිඩෙස් පක්ෂය වසර 16ක් පුරා රට පාලනය කළ විශිෂ්ට පාලක පක්ෂයක්. නමුත් නැවත බලයට පත්වීම සඳහා අප දැන් ශක්තිමත් විපක්ෂයක් ලෙස වැඩකටයුතු වෙනස් කරගත යුතුයි.”
නව අග්රාමාත්ය පීටර් මාග්යර්ගේ නායකත්වයෙන් යුත් රජය මේ වන විට හංගේරියාවේ ව්යවස්ථාපිත වෙනස්කම් සිදුකිරීමට පියවර ගනිමින් සිටින අතර, යුක්රේනයට යුරෝපා සංගමයේ (EU) සාමාජිකත්වය ලබාදීම සඳහා මින් පෙර ඕර්බන් පනවා තිබූ නිෂේධ බලය (Veto) ඉවත් කිරීමටද එකඟ වී තිබේ.
තොරතුරු උපුටා ගැනීම: AL Jazeera ඇසුරින්
