වෙළෙඳපොළ ද්රවශීලතාවයේ (Market Liquidity) දක්නට ලැබෙන දැඩි පහත වැටීම සහ වෙළෙඳපොළ තුළ පවතින අවිනිශ්චිත තත්ත්වය හේතුවෙන් පොලී අනුපාත සීඝ්රයෙන් ඉහළ යාම වැළැක්වීම සඳහා, පසුගිය බදාදා (10) පැවති වෙන්දේසියේදී රාජ්ය ණය කළමනාකරණ කාර්යාලය (PDMO) විසින් ඉදිරිපත් කළ භාණ්ඩාගාර බිල්පත්වලින් පිළිගෙන ඇත්තේ 51.2%ක ප්රමාණයක් පමණි.
මෙම වෙන්දේසියේදී රුපියල් බිලියන 140ක භාණ්ඩාගාර බිල්පත් ප්රමාණයක් වෙන්දේසියට ඉදිරිපත් කර තිබුණද, රුපියල් බිලියන 201ක වටිනාකමකින් යුත් ලංසු ලැබී තිබුණි. කෙසේ වෙතත්, ඉන් පිළිගෙන ඇත්තේ රුපියල් බිලියන 71.7ක් පමණක් වන අතර, එමගින් ඉදිරිපත් කළ තොගයෙන් 48.8%ක් විකිණී නොමැත. එහි ප්රතිඵලයක් ලෙස මාස තුනක බිල්පත් බරිත සාමාන්ය අස්වැන්න (WAYR) 10.09% දක්වා ද, මාස හයක බිල්පත් 10.27% දක්වා ද, වසරක බිල්පත් 10.16% දක්වා ද සුළු වශයෙන් ඉහළ ගොස් ඇත.
මැයි 19 වන දින රුපියල් බිලියන 181.68ක්ව පැවති වෙළෙඳපොළ ද්රවශීලතාවය, ජූනි 9 වන දින වන විට රුපියල් බිලියන 59.2 දක්වා දැඩි ලෙස පහත වැටී ඇත. වෙළෙඳපොළේ පවතින තිගැස්ම හේතුවෙන් ඉහළ පොලී අනුපාත දිගු කාලීන ණය පත්ර සඳහා ව්යාප්ත වීම වැළැක්වීමේ අරමුණින්, වැඩි ලංසු ප්රමාණයක් කෙටි කාලීන බිල්පත් සඳහා පිළිගෙන දීර්ඝ කාලීන ලංසු බොහෝමයක් ප්රතික්ෂේප කිරීමට PDMO පියවර ගෙන තිබේ. මහ බැංකුව විසින් පසුගිය මාසයේදී ප්රතිපත්තිමය පොලී අනුපාත පදනම් අංක 100කින් ඉහළ දැමීම වෙළෙඳපොළ තුළ ඇතිවූ මෙම කලබලකාරී තත්ත්වයට ප්රධාන හේතුව බව බොහෝ විශේෂඥයන් පෙන්වා දෙන අතර, මෙම තත්ත්වය සමනය වීමට යම් කාලයක් ගතවනු ඇතැයි අපේක්ෂා කෙරේ.
