එක්සත් ජාතික පක්ෂයේ කෘත්යාධිකාරී මණ්ඩලයේ විශේෂ හමුවක් අමතමින් හිටපු ජනාධිපති රනිල් වික්රමසිංහ මහතා වත්මන් දේශපාලන හා ආර්ථික තත්ත්වය පිළිබඳව දැඩි විවේචනාත්මක අදහස් පළ කළේය. කොළඹ, මල් පාරේ පිහිටි ඒ මහතාගේ දේශපාලන කාර්යාලයේදී මෙම සාකච්ඡාව පැවැත්විණි.
පවතින රාජ්ය ප්රතිපත්ති හේතුවෙන් මෙරට මූල්ය ස්ථාවරත්වය බරපතළ අවදානමකට ලක්ව ඇති බව රනිල් වික්රමසිංහ මහතා පෙන්වා දුන්නේය. වත්මන් පාලන යාන්ත්රණයේ පවතින දුර්වලතා නිසා ආසන්න අනාගතයේදීම ආර්ථිකයේ පූර්ණ බිඳවැටීමක් සිදුවීම වැළැක්විය නොහැකි බවත්, එහි අහිතකර ප්රතිඵල අවසානයේදී පොදු මහජනතාවට විඳ දරා ගැනීමට සිදුවනු ඇති බවත් හිටපු ජනාධිපතිවරයා අවධාරණය කළේය.
ආර්ථික අස්ථාවරත්වයට අමතරව රටේ සමාජීය හා සංස්කෘතික පදනමට එල්ල වී ඇති බලපෑම් පිළිබඳවද රනිල් වික්රමසිංහ මහතා මෙහිදී කරුණු දැක්වීය. වත්මන් පාලනය විසින් දේශීය අනන්යතාවේ ප්රධාන කුළුණු ද්විත්වයක් ඉලක්ක කරගෙන ඇති බවට ඔහු චෝදනා කළේය.
මෙරට ඓතිහාසික හා සංස්කෘතික උරුමය සුරක්ෂිත කරන මහා සංඝරත්නය මෙන්ම දේශයේ ස්වෛරීභාවය වෙනුවෙන් කැපවූ රණවිරු ප්රජාව පීඩාවට පත් කරමින්, ඔවුන් සතු සමාජීය වටිනාකම් සහ බලය ක්රමයෙන් ක්ෂය කර දැමීමේ සූක්ෂ්ම වැඩපිළිවෙළක් වර්තමාන රාජ්ය පාලනය තුළ ක්රියාත්මක වන බව හිටපු ජනාධිපතිවරයා වැඩිදුරටත් කියා සිටියේය.
