14 වන වරටත් පැවැත්වුණු ජාතික පැරා මළල ක්රීඩා උළෙල ඊයේ (ජූනි 14) දියගම මහින්ද රාජපක්ෂ ක්රීඩාංගණයේදී සාර්ථකව නිමාවට පත් විය. ශ්රී ලංකාව නියෝජනය කරන විවිධ ආබාධ සහිත ක්රීඩක ක්රීඩිකාවන් 450කට අධික පිරිසක් ක්රීඩා සමාජ 38ක් යටතේ මෙම තරඟාවලියට සහභාගී වූ අතර, මෙහි ප්රධාන අරමුණ වූයේ 2026 ඔක්තෝබර් මාසයේ ජපානයේ නාගොයා නගරයේ පැවැත්වීමට නියමිත ආසියානු පැරා ක්රීඩා තරඟාවලිය සඳහා ශ්රී ලංකා සංචිතය තෝරා ගැනීම සහ දක්ෂතා ඇගයීමයි. මෙවර තරඟාවලියේ දක්ෂතම ක්රීඩිකාව ලෙස ජනනි දහන්ජනාත්, දක්ෂතම ක්රීඩකයා ලෙස සමිත දුලන් සම්මාන දිනාගත්හ. කණ්ඩායම් ශූරතා අංශයෙන් පිරිමි අංශයේ ශූරතාව එස්.එල්.එල්.අයි (SLLI) ක්රීඩා සමාජය විසින් ද, අනුශූරතාව රිහැබ් ලංකා ක්රීඩා සමාජය විසින් ද දිනාගනු ලැබීය. කාන්තා අංශයේ ශූරතාව ශ්රී ලංකා අන්ධ විද්යාලයීය ක්රීඩා සමාජය සහ වරෝද් (VAROD) ක්රීඩා සමාජය විසින් සමව බෙදා ගන්නා ලදී. මෙවරද විවෘත පැරා මළල ක්රීඩා උළෙලේ ප්රධාන අනුග්රාහකත්වය ශ්රී ලංකාවේ ප්රමුඛතම දුරකථන සේවා ජාලයක් වන ඩයලොග් ආසියාටා සමාගම විසින් සැපයූ අතර, ක්රීඩා අමාත්යාංශය, එම්.ඒ.එස්. ඇන්ගුලුම් සමාගම සහ පෙරේරා සහ පුත්ර සමාගම විසින් තරඟාවලියේ සාර්ථකත්වය සඳහා සිය දායකත්වය ලබා දෙන ලදී.
