එක්සත් රාජධානියේ සිට එක්සත් අරාබි එමීර් රාජ්යය (UAE) වෙත ගමන් මලු තුළ සඟවා පවුම් මිලියන 30කට අධික මුදලක් ජාවාරම් කළ අපරාධ කල්ලියක් සහ ඔවුන්ට සහාය දුන් ගුවන් තොටුපළ සේවිකාවක් ඇතුළු පිරිසක් වරදකරුවන් වී තිබේ. 2017 දෙසැම්බර් සිට 2019 නොවැම්බර් දක්වා කාලය තුළ මැන්චෙස්ටර්, බර්මින්හැම් සහ බ්රසල්ස් ගුවන් තොටුපළවල් හරහා මෙම මහා පරිමාණ මුදල් විශුද්ධිකරණය සිදුව ඇත. මෙම අපරාධ කල්ලිය විසින් එක්සත් රාජධානියේ විවිධ නගරවල සංවිධානාත්මක අපරාධ කණ්ඩායම්වලින් මුදල් එකතු කර, ඒවා ඇඳුම් අතර සඟවා ගමන් මලු තුළ අසුරා ඩුබායි වෙත ගෙන ගොස් තිබේ. මෙම ජාවාරම සඳහා මූලිකත්වය ගෙන ඇත්තේ ඩුබායි හි සිටින පුද්ගලයෙකු බව හෙළි වී ඇත. මෙම ජාවාරම සාර්ථක කර ගැනීමට මැන්චෙස්ටර් ගුවන් තොටුපළේ සේවය කළ එමා රවුෆ් (Emma Rauf) නම් පිරික්සුම් කවුළු (Check-in) සේවිකාවගේ සහාය ලැබී තිබේ. ඇය තම තනතුර අවභාවිත කරමින් මුදල් පිරවූ ගමන් මලු බර සීමාව ඉක්මවා තිබුණද, ඒවා පරීක්ෂාවකින් තොරව ගුවන් යානයට යැවීමට සහාය වී ඇත. ඇය වැඩ නොකරන දිනවලදී තම සගයන්ටද ඒ ආකාරයෙන්ම කටයුතු කරන ලෙස උපදෙස් දී තිබේ.
ජාවාරමට සම්බන්ධ වූ එක් අවස්ථාවක රවුෆ් සහ ඇගේ සහෝදරයා වන බෙන් රොයිල් (Ben Royle) සතුව තිබූ පවුම් 406,500ක් වටිනා මුදල් තොගයක් මෝටර් රථයක තිබියදී සොරා ගැනීම නිසා කල්ලිය තුළ අභ්යන්තර ආරවුලක් හටගෙන ඇත. මෙම මුදල් සොරා ගත් බවට සැකපිට ඔවුන්ව තර්ජනයට ලක් කර ඇති අතර, පසුව රවුෆ්ගේ දෙමාපියන්ගේ නිවසට වෙඩි තැබීමේ සිදුවීමක් ද වාර්තා විය. නිවසේ කිසිවෙකු නොසිටි නිසා ජීවිත හානි සිදුවී නොමැති නමුත්, එම අපරාධ කල්ලියේ ප්රචණ්ඩත්වය එයින් මනාව පැහැදිලි වේ. බෝල්ටන් ක්රවුන් අධිකරණය විසින් මෙම සිද්ධියට අදාළව පිරිසක් වරදකරුවන් කර තිබේ; වරද පිළිගත් පිරිස ලෙස එමා රවුෆ්, බෙන් රොයිල් සහ ෂෙයික් ජෝබ් ද, අධිකරණය මගින් වරදකරුවන් වූ පිරිස ලෙස ඩෙවනයිල් ග්රැහැම්, ෂෙල්ඩන් නෝයෙල්, ලමාරා නෝයෙල්, හෙදර් ජෙෆ්රි සහ සෝෆි ලෝගන් ද පත්කර ඇත. මෙම සැකකරුවන්ගෙන් බොහෝ දෙනෙකු නිතරම ඩුබායි වෙත ගමන් කරමින් විශාල මුදල් ප්රමාණයක් එරටට ප්රකාශ කර තිබේ. ජාතික අපරාධ ඒජන්සිය (NCA) විසින් මෙම මහා පරිමාණ ජාවාරම හෙළි කර ගත්තේ ගුවන් තොටුපළවල් කිහිපයකදී විශාල මුදල් තොග අත්අඩංගුවට ගැනීමෙන් අනතුරුවය. ජාතික අපරාධ ඒජන්සියේ නිලධාරීන් පවසන්නේ, මුදල් යනු සංවිධානාත්මක අපරාධවල “රුධිරය” වැනි දෙයක් බවත්, මෙවැනි ජාවාරම්වලින් ලෝකය පුරා ප්රචණ්ඩත්වය සහ අනාරක්ෂිතභාවය ඉහළ යන බවත්ය. වරදකරුවන්ට දඬුවම් නියම කිරීම ඔක්තෝබර් මාසයේදී සිදු කිරීමට නියමිතය.
