පාස්කු ඉරුදින ප්රහාරය සම්බන්ධයෙන් ත්රස්තවාදය වැළැක්වීමේ පනත යටතේ තමන් අත්අඩංගුවට ගැනීම හෝ රැඳවුම් නියෝග මත රඳවාගෙන ප්රශ්න කිරීම වළක්වාලන රිට් ආඥාවක් නිකුත් කරන ලෙස ඉල්ලා හිටපු ජනාධිපති ගෝඨාභය රාජපක්ෂ මහතා අභියාචනාධිකරණයට රිට් පෙත්සමක් ගොනු කර තිබේ.
නීතිඥ සනත් විජේවර්ධන මහතා මාර්ගයෙන් ගොනු කර ඇති මෙම පෙත්සමේ වගඋත්තරකරුවන් ලෙස පොලිස්පතිවරයා සහ අපරාධ පරීක්ෂණ දෙපාර්තමේන්තුවේ අධ්යක්ෂ ශානි අබේසේකර මහතා ඇතුළු පිරිසක් නම් කර ඇත.
පෙත්සම්කරු සිය පෙත්සම මගින් ඉදිරිපත් කර ඇති ප්රධාන කරුණු කිහිපයක් පහත දැක්වේ.
චැනල් ෆෝ (Channel 4) නාළිකාවෙන් හෙළි කළ තොරතුරු පදනම් කරගෙන පාස්කු ප්රහාරය සම්බන්ධයෙන් කුමන මොහොතක හෝ තමන් අත්අඩංගුවට ගැනීමේ සහ ත්රස්තවාදය වැළැක්වීමේ පනත යටතේ රඳවාගෙන ප්රශ්න කිරීමේ අවදානමක් පවතින බව පෙත්සම්කරු පෙන්වා දෙයි.
තමන් ජනාධිපතිවරයා ලෙස කටයුතු කළ සමයේ අපරාධ පරීක්ෂණ දෙපාර්තමේන්තුවේ අධ්යක්ෂ ශානි අබේසේකර මහතා ව්යාජ සාක්ෂි නිර්මාණය කිරීමේ සිද්ධියක් මත අත්අඩංගුවට පත්ව තිබූ බවත්, පාස්කු ප්රහාරය පිළිබඳ ජනාධිපති කොමිසම ඔහුට එරෙහිව නිර්දේශ කර ඇති බවත් පවසන පෙත්සම්කරු, එවැනි පසුබිමක් තුළ ඔහුගෙන් සාධාරණ සහ අපක්ෂපාතී පරීක්ෂණයක් බලාපොරොත්තු විය නොහැකි බව සඳහන් කරයි.
පාස්කු ප්රහාරයට තමන් සම්බන්ධ බවට කිසිදු සාක්ෂියක් නොමැති බව අවධාරණය කරන හිටපු ජනාධිපතිවරයා, තමන්ව අත්අඩංගුවට ගැනීම ස්වාභාවික යුක්තියේ මූලධර්මවලට පටහැනි සහ නීති විරෝධී බව ප්රකාශ කර ඇත.
මෙම තත්ත්වයන් මත තමන් අත්අඩංගුවට ගැනීම වළක්වන රිට් ආඥාවක් නිකුත් කරන ලෙසත්, පාස්කු ප්රහාරය සම්බන්ධයෙන් පත් කළ විනිසුරු ජනක් ද සිල්වා මහතාගේ ප්රධානත්වයෙන් යුත් කමිටු වාර්තාව සහ ඊට අදාළ ලියකියවිලි අධිකරණයට ඉදිරිපත් කිරීමට නියම කරන ලෙසත් පෙත්සම්කරු වැඩිදුරටත් ඉල්ලා සිටියි.
