රිය අනතුරු අවම කිරීමේ අරමුණින් ක්රියාත්මක ‘සුරැකෙමු මගතොට’ වැඩසටහනේ දෙවන අදියරේ හයවන වැඩසටහන තෙල්දෙණිය ජාතික පාසලේ දී අද දිනයේ ආරම්භ කෙරේ. දිනෙන් දින ඉහළ යන රථවාහන අනතුරු රටේ අනාගත පරපුරට සහ පොදු මහජනතාවට එල්ල කර ඇති තර්ජනය හමුවේ, මාර්ග ආරක්ෂාව පිළිබඳ සංස්කෘතියක් පාසල් මට්ටමින් ස්ථාපිත කිරීමේ හදිසි අවශ්යතාවය මෙම වැඩසටහන හරහා යළි අවධාරණය කරනු ලබයි.
ක්ලීන් ශ්රී ලංකා ලේකම් කාර්යාලය, අධ්යාපන අමාත්යාංශය, ශ්රී ලංකා පොලිසිය සහ මෝටර් රථ ප්රවාහන දෙපාර්තමේන්තුව එක්ව සංවිධානය කරනු ලබන මෙම ජාතික වැඩසටහන, මාර්ග නීති පිළිපැදීම සහ රියදුරු වගකීම් පිළිබඳව පාසල් දරුවන් දැනුවත් කිරීම අරමුණු කරගනී. මාර්ගවලදී සිදුවන අනතුරු බහුතරයක් මානව ක්රියාකාරකම් සහ නොසැලකිලිමත්කම හේතුවෙන් සිදුවන බැවින්, තරුණ පරපුර මාර්ග ආරක්ෂාව පිළිබඳ සමාජ බලකායක් ලෙස සන්නද්ධ කිරීම තුළින් දිගුකාලීන විසඳුම් කරා එළඹීම මෙම වැඩසටහනේ මූලික අභිප්රාය වී තිබේ.
මෙවැනි දැනුවත් කිරීමේ වැඩසටහන් හරහා මාර්ග භාවිත කරන්නන්ගේ හැසිරීම් රටාවේ ධනාත්මක වෙනසක් අපේක්ෂා කළ හැකි අතර, එය රටේ මාර්ග ආරක්ෂණ දර්ශකවල දියුණුවට සහ අහිමි වන ජීවිත සංඛ්යාව අවම කර ගැනීමට මහඟු දායකත්වයක් වනු ඇත. අනාගත රියදුරන් ලෙස පාසල් දරුවන් දැනුවත් කිරීමේ මෙම ක්රියාවලිය ජාතික මට්ටමින් පුළුල් කිරීමේ අවශ්යතාවය උද්ගතව ඇති අතර, වගකිවයුතු ආයතනවල මෙම ඒකාබද්ධ මැදිහත්වීම අනතුරු රහිත මාර්ග පද්ධතියක් උදෙසා තබන වැදගත් පියවරක් ලෙස සැලකිය හැකිය.
