ක්රිකට් පිටියේදී ඉන්දියාව 11 වැනි වරටත් පාකිස්තානය සමඟ අතට අත දීමෙන් වැළකී ඉවත බලාගෙන යාමේ ප්රතිපත්තිය මෙවර කාන්තා ක්රිකට් ලෝක කුසලාන තරගාවලියේදී ද ක්රියාත්මක කර තිබේ. තරගයේ කාසියේ වාසිය උරගා බැලීමෙන් අනතුරුව ඉන්දීය ක්රිකට් නායිකා හර්මන්ප්රීත් කෞර්, පාකිස්තාන නායිකා ෆාතිමා සානා සමඟ අතට අත දීමෙන් වැළකී සිටි අතර ඇය කෙළින්ම නිවේදිකා මෙල් ජෝන්ස් සමඟ සාකච්ඡාවට අවතීර්ණ වූවාය. පහල්ගම් ප්රහාරයෙන් පසු දෙරට අතර හටගත් නොසන්සුන් රාජ්යතාන්ත්රික වාතාවරණය හේතුවෙන් ඉන්දීය කණ්ඩායම මෙම දැඩි තීරණය අනුගමනය කරනු ලබයි.
ආසියානු කුසලාන තරගාවලියෙන් ආරම්භ වූ මෙම ‘අහක බලාගෙන යාමේ ප්රතිපත්තිය’ යටතේ දෙරට අතර පැවැති තරග තුනේදීම අතට අත දීමක් සිදු නොවූ අතර, පසුගිය වසරේ ඔක්තෝබර් මාසයේ පැවැති කාන්තා එක්දින ලෝක කුසලාන තරගවලදී ද මෙම පුරුද්ද එලෙසම පැවතිණි. ඉන් අනතුරුව නොවැම්බර් මාසයේ පැවැති පිරිමි රයිසින් ස්ටාර් ආසියානු කුසලාන තරගාවලියේදී ද තමන් පාකිස්තානය සමඟ අතට අත නොදෙන බව ඉන්දීය කණ්ඩායම ස්ථිරවම ප්රකාශ කර සිටියේය.
දෙසැම්බර් මාසයේ පැවැති 19න් පහළ ආසියානු කුසලාන තරගාවලියේදී ඉන්දියාව සහ පාකිස්තානය තරග දෙකක් ක්රීඩා කළ ද මෙම ඉවත බලා යාමේ සම්ප්රදාය අත්නෑරූ අතර, මේ වසරේ පෙබරවාරි මාසයේ පැවැති 19න් පහළ ලෝක කුසලාන තරගාවලියේදී ද පාකිස්තාන ක්රීඩකයන් සමඟ අතට අත දීම් සිදු නොවීය. මෙම ක්රීඩා රාජ්යතාන්ත්රික ස්ථාවරය පසුගිය පෙබරවාරි මාසයේ පැවැති පිරිමි විස්සයි20 ලෝක කුසලාන තරගාවලියේදී ද එක ලෙස දක්නට ලැබුණු බව ක්රීඩා විචාරකයෝ පෙන්වා දෙති.
