ශ්රී ලංකාවේ සිනමා සහ කලා ක්ෂේත්රය ආරක්ෂා කරමින් එය නූතන ලෝකයට ගැළපෙන පරිදි නවීකරණය කිරීම උදෙසා පුළුල් ජාතික වැඩපිළිවෙළක අවශ්යතාවය විපක්ෂ නායක සජිත් ප්රේමදාස මහතා අවධාරණය කරයි. අද (20) කොළඹ පිහිටි විපක්ෂ නායක කාර්යාලයේදී ශ්රී ලංකා සිනමා කලාකරුවන්ගේ සංගමයේ අධ්යක්ෂවරුන් සමඟ පැවැති සාකච්ඡාවකදී ඔහු මේ බව සඳහන් කළේය.
මෙම සාකච්ඡාවේදී දශක ගණනාවක් පුරා ගොඩනැගුණු කලා ක්ෂේත්රයේ සාම්ප්රදායික ශක්තීන් ආරක්ෂා කරගනිමින්, නව අදහස්, තාක්ෂණය සහ ක්රමවේද සමඟ එය ඉදිරියට රැගෙන යාමේ වැදගත්කම පිළිබඳව පුළුල් ලෙස සාකච්ඡා කෙරිණි. කලා ක්ෂේත්රයට ආයෝජන ආකර්ෂණය කර ගැනීම සහ කලාකරුවන් දිරිගැන්වීම සඳහා සහනදායී ණය යෝජනා ක්රම හඳුන්වා දීමේ අවශ්යතාවය ද මෙහිදී මතු විය. එසේම YouTube, Netflix සහ කෘත්රිම බුද්ධිය (AI) වැනි නැගී එන වේදිකා සහ තාක්ෂණයන් සාම්ප්රදායික මාධ්ය සමඟ මුසු කරමින් කර්මාන්තය ශක්තිමත් කිරීම පිළිබඳව ද අවධානය යොමු කෙරිණි.
සිනමා ක්ෂේත්රය දේශපාලන අරමුණු සඳහා භාවිත නොකර, රාජ්ය සහ පෞද්ගලික අංශයේ සහභාගීත්වයෙන් යුත් ජාතික සිනමා වැඩපිළිවෙළක් ක්රියාත්මක කිරීමේ අවශ්යතාවය විපක්ෂ නායකවරයා මෙහිදී විශේෂයෙන් අවධාරණය කළේය. මූල්යමය ආධාර පමණක් ප්රමාණවත් නොවන බවත්, නිර්මාණශීලී නිෂ්පාදන ප්රේක්ෂකයා වෙත ළඟා කර ගැනීමේ ක්රමවේදයන් පිළිබඳව ද සැලකිලිමත් විය යුතු බවත් ඔහු පෙන්වා දුන්නේය. ශ්රී ලංකාවේ කලා ක්ෂේත්රයේ අනාගතය වෙනුවෙන් විධිමත් උපායමාර්ගික සැලැස්මක් සකස් කිරීමට විපක්ෂ නායක කාර්යාලය සියලු පාර්ශ්වයන් සමඟ එක්ව පහසුකම් සලසා දීමට සූදානම් බවද ඔහු වැඩිදුරටත් පැවසීය.
