පොල්තෙල් ආනයනය මත රජය විසින් පැනවීමට යෝජනා කර ඇති නව බදු ප්රතිපත්තිය හේතුවෙන් ශ්රී ලංකාවේ පොල් අපනයන කර්මාන්තය දැඩි අවදානමකට ලක්විය හැකි බව පාර්ලිමේන්තු මන්ත්රී හර්ෂ ද සිල්වා මහතා පවසයි. සිය ‘X’ ගිණුමේ සටහනක් තබමින් ඔහු පෙන්වා දෙන්නේ, මෙමගින් විදේශ විනිමය ඉපැයීම් අඩුවීම මෙන්ම ගොවීන් සහ කර්මාන්ත සේවකයින් ද අපහසුතාවට පත්වන බවයි.
මන්ත්රීවරයා පෙන්වා දෙන පරිදි, මෙම නව බද්ද නිසා පොල්තෙල් කිලෝග්රෑමයක ආනයන පිරිවැය රුපියල් 1,250 – 1,400 දක්වා ඉහළ යා හැකි අතර, දේශීය පොල් ගෙඩි අගය එකතු කළ අපනයන ද්රව්ය වෙනුවට දේශීය තෙල් නිෂ්පාදනය සඳහා යොමුවීමෙන්, අපනයන කොන්ත්රාත්තු බිඳ වැටී අපනයන ආදායම විශාල ලෙස පහත වැටෙනු ඇත. ආනයන සම්පූර්ණයෙන්ම නතර වුවහොත්, බදු මගින් අපේක්ෂිත ආදායම නොලැබී යන බවත්, එය රජයට සිදුවන පාඩුවක් බවත් ඔහු සඳහන් කරයි. එසේම, 2026 වසරේ තෙවන සහ සිව්වන කාර්තු වන විට මෙම කර්මාන්තය දැඩි පීඩනයකට ලක්වනු ඇති බව මන්ත්රීවරයා පෙන්වා දෙයි.
මෙම ගැටලුව සම්බන්ධයෙන් තමන් මුදල් පිළිබඳ කාරක සභාවේදී (COPF) කරුණු මතු කළ බව පවසන මන්ත්රීවරයා, රජයට මේ සම්බන්ධයෙන් වඩාත් සැලකිලිමත් වන ලෙසත්, වැරදි බදු ප්රතිපත්ති මගින් කර්මාන්ත පමණක් නොව ගොවීන් සහ සේවකයින් ද පීඩාවට පත්වන බවත් අවධාරණය කළේය.
