සබරගමුව පළාත් අධ්යාපන අමාත්යාංශය විසින් රත්නපුර දිස්ත්රික්කයේ අතිදුෂ්කර ලෙස වර්ගීකරණය කර ඇති පාසල් වෙනුවෙන් රුපියල් ලක්ෂ 2460ක් වටිනා නවීන තාක්ෂණික උපකරණ පද්ධති ප්රදානය කිරීම පසුගියදා සබරගමුව පළාත් සභා ශ්රවණාගාරයේදී සිදුවිය. සබරගමුව පළාත් ආණ්ඩුකාර චම්පා ජානකී රාජරත්න සහ රත්නපුර දිස්ත්රික් සම්බන්ධීකරණ කමිටුවේ සම සභාපති පාර්ලිමේන්තු මන්ත්රී ශාන්ත පත්මකුමාර යන මහත්ම මහත්මීන්ගේ ප්රධානත්වයෙන් පැවැති මෙම උත්සවයේ මූලික අරමුණ වූයේ දිස්ත්රික්කය තුළ පවතින ඩිජිටල් අධ්යාපන පරතරය අවම කරමින් සිසු දරුවන් ලෝකය සමඟ සම්බන්ධ කිරීමයි.
විශේෂයෙන්ම ග්රාමීය මට්ටමේ පවතින පාසල් සඳහා මෙම තාක්ෂණික පහසුකම් ලබාදීම තුළින්, නාගරික සහ ග්රාමීය පාසල් අතර පවතින අධ්යාපන අවස්ථා පිළිබඳ විෂමතාවය අවම කර ගැනීමට මග පෑදෙනු ඇත. වර්තමාන ගෝලීය රැකියා වෙළඳපොළ සහ අධ්යාපන ප්රමිතීන් හමුවේ තොරතුරු තාක්ෂණය අත්යවශ්ය සාධකයක් වී ඇති පසුබිමක, මෙම ආයෝජනය දරුවන්ගේ අනාගත දියුණුව වෙනුවෙන් රජය විසින් ගනු ලැබූ කාලෝචිත පියවරක් ලෙස සැලකිය හැකිය. එමෙන්ම, භෞතික සම්පත් සීමිත පාසල්වල දරුවන්ගේ කුසලතා මතු කර ගැනීමට මෙම උපකරණ පද්ධති ප්රබල පිටුබලයක් වනු ඇත.
මෙම ව්යාපෘතියේ සාර්ථකත්වය රඳා පවතින්නේ එම උපකරණ නිසි ලෙස නඩත්තු කිරීම සහ ඒ පිළිබඳව ගුරු භවතුන් හා සිසුන් දැනුවත් කිරීම මතයි. ඉදිරියේදී සෙසු දිස්ත්රික්කයන්හි ද මෙවැනි තාක්ෂණික වැඩසටහන් පුළුල් කිරීම හරහා මෙරට අධ්යාපන පද්ධතිය තුළ ඩිජිටල් සාක්ෂරතාව ඉහළ නැංවීමට මනා පිටිවහලක් ලැබෙනු ඇත. රාජ්ය ප්රතිපත්ති සම්පාදනය කිරීමේදී අධ්යාපනය සඳහා ලබාදෙන මෙවැනි ප්රමුඛතා, දිගුකාලීනව රටේ ආර්ථික හා සමාජීය සංවර්ධනයට සෘජුවම බලපෑම් කරනු ඇති බවට විද්වතුන් පෙන්වා දෙති.
