චාවකච්චේරිය නගර සභාවේ උප සභාපති ජී. කිෂෝර් මහතා, ඔහුගේ උප සභාපති ධුරයෙන් මෙන්ම සභා මන්ත්රී ධුරයෙන් ද වහාම ක්රියාත්මක වන පරිදි ඉවත් කිරීමට උතුරු පළාත් ආණ්ඩුකාර එන්. වේදනායහන් මහතා පියවර ගෙන තිබේ. ජූනි 19 වැනිදා නිකුත් කරන ලද විශේෂ ගැසට් නිවේදනයක් මඟින් මෙම ඉවත් කිරීම සිදු කර ඇත්තේ චාවකච්චේරිය නගර සභාව සම්බන්ධයෙන් විශ්රාමික දිස්ත්රික් විනිසුරුවරයෙකු ලවා සිදුකළ පරීක්ෂණයක වාර්තාව පදනම් කරගනිමිනි.
කෙසේ වෙතත්, ආණ්ඩුකාරවරයාගේ මෙම තීරණය දැඩි ලෙස හෙළා දකිමින් ශ්රී ලංකා පොදුජන පෙරමුණේ (SLPP) පාර්ලිමේන්තු මන්ත්රී නාමල් රාජපක්ෂ මහතා සිය ‘X’ ගිණුමේ සටහනක් තබා ඇත. පළාත් පාලන කොමසාරිස්වරයාගේ චක්රලේඛයක් විවේචනය කිරීම හේතුවෙන් ජනතා ඡන්දයෙන් පත් වූ නියෝජිතයෙකු මෙලෙස ධුරවලින් පලවා හැරීම බරපතළ බලය අභිභවා යෑමක් සහ ප්රජාතන්ත්රවාදයට එල්ල කළ ප්රහාරයක් බව නාමල් රාජපක්ෂ මහතා පවසයි. පළාත් සභා මැතිවරණය ද කල් දමමින්, රජය විසින් ආණ්ඩුකාර බලතල යොදාගෙන තමන්ව විවේචනය කරන පිරිස් නිහඬ කිරීමට උත්සාහ කරන බවට ද ඔහු චෝදනා කර සිටියි.
