ජනාධිපති අනුර කුමාර දිසානායක මහතා ලබන ජූලි 16 වැනිදා ප්රංශයේ නිල සංචාරයක නිරත වීමට නියමිතව ඇති බව වාර්තා වේ. මෙම තීරණාත්මක සංචාරය පිළිබඳ තොරතුරු අනාවරණය වූයේ වරාය හා සිවිල් ගුවන්සේවා අමාත්ය අනුර කරුණාතිලක මහතා සහ ප්රංශ තානාපතිවරයා ප්රමුඛ ප්රමුඛ පෙළේ ප්රංශ ආයෝජකයින් අතර පැවති උසස් මට්ටමේ සාකච්ඡාවකදීය. රටේ ආර්ථික පුනර්ජීවනය ඉලක්ක කර ගනිමින් විදේශ ආයෝජන දිරිගැන්වීමට රජය ගෙන යන වැඩපිළිවෙළේ තවත් පියවරක් ලෙස මෙම සංචාරය සැලකේ.
සාකච්ඡාවේදී විශේෂ අවධානයක් යොමු වූයේ ගෝලීය සමුද්රීය සැපයුම් දාමයේ ප්රමුඛයෙකු වන CMA CGM සමාගමේ මෙහෙයුම් කටයුතු ශ්රී ලංකාව තුළ පුළුල් කිරීම සම්බන්ධයෙනි. එම සමාගමේ ප්රධාන නියෝජ්ය සභාපතිනි ක්රිස්ටීන් කැබෝ මහත්මිය පෙන්වා දුන් පරිදි, කොළඹ වරායේ ඇති උපාය මාර්ගික පිහිටීම බහාලුම් ප්රතිඅපනයන කටයුතු සඳහා ඉහළ හැකියාවක් දරයි. දැනටමත් නැගෙනහිර පර්යන්තයේ මෙහෙයුම්වලින් අඩකට වඩා වැඩි ප්රමාණයක් එම සමාගම විසින් සිදු කරනු ලබන අතර, ඉදිරියේදී බටහිර පර්යන්තයේ දෙවන අදියරේ ආයෝජන අවස්ථා සම්බන්ධයෙන්ද ඔවුන් දැඩි උනන්දුවක් දක්වයි.
ශ්රී ලංකාව ඉන්දියානු සාගර කලාපයේ ප්රධාන නාවික හා ගුවන් මධ්යස්ථානයක් ලෙස ස්ථාපිත කිරීම රජයේ මූලික ඉලක්කය බව අමාත්ය අනුර කරුණාතිලක මහතා මෙහිදී අවධාරණය කළේය. ඒ සඳහා අවශ්ය ජාත්යන්තර ආයෝජන සහ තාක්ෂණික සහයෝගය ලබා ගැනීමේ අරමුණින් ජනාධිපතිවරයාගේ මෙම සංචාරය අතිශයින් තීරණාත්මක වේ. වරාය සංවර්ධනයට සමගාමීව ගුවන් භාණ්ඩ ප්රවාහන ක්ෂේත්රයද නවීකරණය කිරීමට ප්රංශයේ සහාය හිමිවීම, ශ්රී ලංකාවේ සැපයුම් දාම කළමනාකරණය ජාත්යන්තර මට්ටමකට ඔසවා තැබීමට සහ දේශීය ආර්ථිකයට නව ජවයක් ලබා දීමට මහෝපකාරී වනු ඇත.
