සමාජ මාධ්ය අවකාශය සාධනීය ලෙස උපයෝගී කරගනිමින් මහජනතාව තුළ පාරිසරික සංවේදීතාව වර්ධනය කිරීමේ අරමුණින් මධ්යම පරිසර අධිකාරිය විසින් සංවිධානය කරන ලද කෙටි වීඩියෝ නිර්මාණ තරගාවලියේ ජයග්රාහකයින් ඇගයීමේ උත්සවය අද (25) පෙරවරුවේ මධ්යම පරිසර අධිකාරී ශ්රවණාගාරයේදී පැවැත්විණි. පරිසර නියෝජ්ය අමාත්ය ඇන්ටන් ජයකොඩි මහතාගේ ප්රධානත්වයෙන් පැවති මෙම උත්සවයේදී, තරුණ නිර්මාණකරුවන්ගේ සන්නිවේදන කුසලතා ඔප්නැංවීම උදෙසා විශේෂ පුහුණු වැඩසටහනක්ද ක්රියාත්මක කෙරිණි.
‘නිසි අපද්රව්ය කළමනාකරණය තුළින් දේශගුණ විපර්යාස අවම කරමු’ යන කාලීන තේමාව ඔස්සේ පැවති මෙම තරගාවලිය, ගෝලීය දේශගුණික අර්බුද හමුවේ තිරසර අනාගතයක් උදෙසා පුරවැසි දායකත්වය ලබා ගැනීමේ ප්රබල මාධ්යයක් විය. අක්රමවත් අපද්රව්ය බැහැර කිරීම සහ දහනය මගින් වායුගෝලයට මුදාහැරෙන හරිතාගාර වායූන් පාලනය කිරීම සඳහා නූතන තාක්ෂණය භාවිතා කරමින් ජනගත කළ මෙම නිර්මාණ, පාරිසරික අභියෝගයන්ට එරෙහි නවීන ප්රවේශයක් ලෙස විද්වතුන්ගේ පැසසුමට ලක්විය.
මෙම අවස්ථාවේදී අදහස් දැක්වූ නියෝජ්ය අමාත්යවරයා අවධාරණය කළේ, පවතින පාරිසරික අභියෝගයන්ට සාර්ථකව මුහුණ දීම සඳහා විද්යාත්මක හා අධ්යාපනික ප්රවේශයන් අත්යවශ්ය බවයි. එහි සුවිශේෂී පියවරක් ලෙස, වසර 26කට පසුව ජාතික පාරිසරික පනත කාලීන අවශ්යතාවන්ට අනුකූලව සංශෝධනය කිරීමට රජය පියවර ගෙන ඇති බවද හෙතෙම වැඩිදුරටත් සඳහන් කළේය. නීතිමය රාමුව ශක්තිමත් කිරීමට සමගාමීව, සමාජ මාධ්ය හරහා නිර්මාණශීලීව පරිසර සුරැකීමේ පණිවිඩය සමාජගත කිරීමට දායක වූ මෙම තරුණ පරපුර දිරිගැන්වීම ජාතික වැදගත්කමක් ඇති කර්තව්යයක් ලෙස අමාත්යාංශය හඳුනා ගෙන තිබේ.
