එක්සත් ජාතීන්ගේ සාමසාධක මෙහෙයුම් සඳහා ශ්රී ලංකාවෙන් යොමු කෙරෙන විශාලතම භට කණ්ඩායම ලෙස සාමාජිකයන් 1,132කින් සමන්විත නව බළඇණියක් හයිටි රාජ්යය වෙත පිටත් කර යැවීමට නියමිතව තිබේ. හයිටි රාජ්යයේ පවතින අර්බුදකාරී වාතාවරණය සමනය කර සාමය ස්ථාපිත කිරීමේ උපායමාර්ගික අරමුණින් මෙම කණ්ඩායම එළැඹෙන අගෝස්තු මාසයේදී රාජකාරි සඳහා පිටත්ව යනු ඇත.
මෙම බළඇණිය සඳහා යුද හමුදා භටයන් 900ක්, පොලිස් විශේෂ කාර්ය බලකායේ නිලධාරීන් 189ක් සහ මෙරට හමුදා ඉතිහාසයේ ප්රථම වතාවට බිම්බෝම්බ හා මර උගුල් නිෂ්ක්රීය කිරීමේ විශේෂ පුහුණුව ලත් යුද හමුදා කාන්තා සාමාජිකාවන් 43ක් ඇතුළත් වේ. මෙහෙයුම්වල කාර්යක්ෂමතාව ඉහළ නැංවීම සඳහා ශ්රී ලංකාවේ නිෂ්පාදිත ‘යුනි බෆල්’ රථ ඇතුළු සන්නද්ධ රථ සහ ජනාධිපති ආරක්ෂක අංශය ලබා දුන් විශේෂ වෙඩි නොවදින රථ දෙකක් ද මෙම කණ්ඩායම වෙත පවරා දී ඇති අතර, සාමසාධක මෙහෙයුම්වල නිරත වීමට නියමිත පිරිසකට සුබපැතුම් එක් කිරීම සඳහා ජනාධිපතිවරයෙකු ප්රථම වතාවට පනාගොඩ පිහිටි රෙජිමේන්තු මධ්යස්ථානය වෙත පැමිණීම ද විශේෂත්වයක් සනිටුහන් කරයි.
ජාත්යන්තර සාම සාධන කටයුතු වෙනුවෙන් ශ්රී ලංකාව දක්වන දායකත්වය සහ හමුදා විශේෂඥතාවය පිළිබඳ ජාත්යන්තර විශ්වාසය මෙම මෙහෙයුම මගින් තවදුරටත් තහවුරු කෙරේ. මෙවැනි මෙහෙයුම් මගින් ගෝලීය වශයෙන් ශ්රී ලංකාවේ ප්රතිරූපය ඉහළ නැංවෙන අතරම, හමුදා සාමාජිකයන්ට ලැබෙන නවීන අත්දැකීම් සහ පුහුණුව අනාගත ජාතික ආරක්ෂක සහ සාමසාධක මෙහෙයුම්වල ගුණාත්මකභාවය වර්ධනය කිරීම සඳහා තීරණාත්මක වනු ඇත.
