වසර 105ක නොනවතින අරගලය චීන ජනතාවගේ අනාගතය සහ ඉරණම මූලික වශයෙන් වෙනස් කර ඇති බව චීන ජනාධිපති ෂී ජින් පිං මහතා පවසයි. ජනාධිපතිවරයා මේ බව අවධාරණය කර සිටියේ අද (01) බෙයිජිංහි පැවති චීන කොමියුනිස්ට් පක්ෂයේ 105 වැනි සංවත්සරය සැමරීමේ උත්සවය අමතමිනි.
මෙම අඛණ්ඩ අරගලය චීන ජාතියේ මහා පුනර්ජීවනය සාක්ෂාත් කරගැනීම සඳහා නිවැරදි මාවත විවර කර ඇති බව ඔහු පෙන්වා දුන්නේය. මාක්ස්වාදයේ බලගතු ජීවගුණය මනාව පෙන්නුම් කරන මෙම වසර 105ක ගමන්මඟ ලෝක ඉතිහාසයේ ගමන් මඟට ද ප්රබල ලෙස බලපා ඇති බවත්, එය ශක්තිමත්ව ගොඩනැගීමට පක්ෂය දායක වී ඇති බවත් ජනාධිපතිවරයා සඳහන් කළේය.
පක්ෂයේ මූලික ප්රතිපත්තියට අනුගතව ඓතිහාසික ජයග්රහණ වෙනුවෙන් සමස්ත පක්ෂයම ජනතාව මත විශ්වාසය තැබිය යුතු බවත්, මතුවිය හැකි අවදානම් සහ අභියෝගයන්ට සක්රීයව ප්රතිචාර දැක්විය යුතු බවත් හෙතෙම අවධාරණය කළේය. තවද, පක්ෂය තුළ පූර්ණ සහ දැඩි ස්වයං පාලනයක් ඉදිරියට ගෙන යා යුතු බව ද ජනාධිපතිවරයා මෙහිදී පෙන්වා දුන්නේය.
මෙම සැමරුම් උත්සවයේදී පක්ෂය හා ජනතාව වෙනුවෙන් ඉහළ කැපවීමෙන් කටයුතු කළ සාමාජිකයන් 08 දෙනෙකු වෙත පක්ෂයේ ඉහළම ගෞරවය වන ‘ජූලි 1 පදක්කම’ පිරිනැමීම ද සිදු කෙරිණි. එමෙන්ම කැපී පෙනෙන මෙහෙවරක් සිදුකළ නිලධාරීන් සහ බිම් මට්ටමේ පක්ෂ සංවිධාන ද මෙහිදී ඇගයීමට ලක්විය.
