වත්මන් ආණ්ඩුවට රට පාලනය කිරීම සඳහා පැහැදිලි වැඩපිළිවෙළක්, දර්ශනයක් හෝ හැකියාවක් නොමැති වීම හේතුවෙන් ඉදිරියේදී රටේ සමස්ත ජනතාවටම ‘අස්වැසුම’ සුබසාධක දීමනාව ලබා දීමට සිදුවනු ඇති බව හිටපු අමාත්ය වජිර අබේවර්ධන මහතා පවසයි. ගාල්ල උළුවිටිකේ එක්සත් ජාතික පක්ෂ දිස්ත්රික් කාර්යාලයේ පැවැති රැස්වීමකින් අනතුරුව මාධ්ය වෙත අදහස් දක්වමින් ඔහු මේ බව සඳහන් කළේය.
ඩෙංගු රෝගය පැතිර යාම පාලනය කරගැනීමට පවා වත්මන් ආණ්ඩුව අසමත් වී ඇති බවත්, රට තුළ මදුරුවන් පාලනය කරගත නොහැකි තත්ත්වයක් උද්ගතව ඇති බවත් ඔහු චෝදනා කරයි. රට මේ වන විට මහා විනාශයකට තල්ලු වෙමින් පවතින බව පෙන්වා දෙන ඒ මහතා, ජනතාවට හුස්ම ගැනීමට පවා නොහැකි තරම් ආර්ථික පීඩනයක් දැනෙමින් පවතින බව සඳහන් කරයි.
දැනට පවතින අස්වැසුම දීමනාවන් කප්පාදු කිරීමට ආණ්ඩුව සූදානම් වන බවත්, එහෙත් පවතින තත්ත්වය අනුව එය සමස්ත රටවැසියන්ටම ලබා දිය යුතු මට්ටමකට රට පත්ව ඇති බවත් ඔහු පවසයි. තවද, රනිල් වික්රමසිංහ මහතා අගමැතිවරයාව සිටි සමයේ හඳුන්වා දුන් තෙල් මිල සූත්රය පිළිබඳ අවබෝධයක් වත්මන් පාලකයින්ට නොමැති වීම නිසා ජනතාව පීඩාවට පත්ව ඇති බවත්, මෙය මහජනතාව විසින්ම තෝරාගත් පාලනයක ප්රතිඵලයක් බවත් හිටපු අමාත්යවරයා වැඩිදුරටත් ප්රකාශ කළේය.
