මෙක්සිකෝවට එරෙහිව පැවති ලෝක කුසලාන අවසන් 16 දෙනාගේ වටයේ තරගයේදී ලැබූ රතු කාඩ්පත හේතුවෙන් එංගලන්ත ආරක්ෂක ක්රීඩක ජරෙල් ක්වාන්සාට (Jarell Quansah) තරග දෙකක තහනමක් පැනවීමට ෆිෆා විනය කමිටුව පියවර ගෙන තිබේ.
මෙම තහනම හේතුවෙන් ක්වාන්සාට නෝර්වේ කණ්ඩායම සමඟ පැවැත්වෙන අර්ධ අවසන් පූර්ව තරගය මෙන්ම, එංගලන්තය අවසන් පූර්ව වටයට සුදුසුකම් ලැබුවහොත් එම තරගය ද මග හැරී යනු ඇත. ෆිෆා විනය සංග්රහයේ 14 වැනි වගන්තිය යටතේ මෙම ක්රියාව බරපතළ වරදක් ලෙස නම් කරමින් මෙම තහනම පනවා ඇති අතර, ලෝක කුසලාන රෙගුලාසි අනුව මෙම තීරණයට එරෙහිව අභියාචනයක් ඉදිරිපත් කළ නොහැක.
මෙක්සිකෝවට එරෙහිව 3-2ක් ලෙස එංගලන්තය ජයගත් එම තරගයේ 54 වැනි මිනිත්තුවේදී වීඩියෝ සහායක විනිසුරු (VAR) සමාලෝචනයකින් පසු ඔහු පිටියෙන් ඉවත් කෙරිණි. ක්වාන්සා පන්දුව ලබාගැනීමට උත්සාහ කළද, ඔහුගේ පාදයේ ස්ටඩ් (studs) මෙක්සිකෝ ක්රීඩක ජේසුස් ගලියාර්ඩෝගේ කකුලේ ඉහළ කොටසේ වැදීම හේතුවෙන් මෙම තීරණය ගනු ලැබීය.
මෙම තහනම හේතුවෙන් එංගලන්ත කළමනාකරු තෝමස් ටුචෙල්ට නෝර්වේ තරගය සඳහා ක්රීඩකයන් තෝරා ගැනීමේදී දැඩි අභියෝගයකට මුහුණ දීමට සිදුව ඇත. රීස් ජේම්ස් ආබාධයකින් සුවය ලබමින් සිටින අතර ඩ්ජෙඩ් ස්පෙන්ස් ද ශාරීරික යෝග්යතා ගැටලුවකට මුහුණ දී සිටීම ඊට හේතුවයි.
පන්දුවට පහර දීමට පෙර සිදුවූ දර්ශන පෙන්වීම වෙනුවට, ගැටුම සිදුවූ මොහොතේ ස්ථිතික රූපයක් පමණක් විනිසුරුට පෙන්වීම සම්බන්ධයෙන් එංගලන්ත නිලධාරීන් සිය අප්රසාදය පළ කර ඇතත්, ෆිෆා විසින් රතු කාඩ්පත සහ තරග තහනම ස්ථිර කර තිබේ.
