කොළඹ නගරයේ සිදුවන වේගවත් සංවර්ධනයත් සමඟ වසර ගණනාවක් තිස්සේ දැඩි ලෙස අපවිත්ර වී ඇති බේරේ වැව පිරිසිදු කිරීම සහ ඉන් හමන දුර්ගන්ධය මැඩපැවැත්වීම සඳහා මේ වන විට විශේෂ සංවර්ධන ව්යාපෘතියක් ක්රියාත්මක වෙමින් පවතින බව නියෝජ්ය අමාත්ය එරංග ගුණසේකර මහතා පවසයි.
බේරේ වැව මුළුමනින්ම පිරිසිදු කර එය යහපත් ජල මූලාශ්රයක් බවට පත් කිරීමේ සමස්ත වගකීම රජයට හෝ කිසියම් රාජ්ය ආයතනයකට පමණක් පැවරිය නොහැකි බවත්, මේ සඳහා සමස්ත මහජනතාවගේ සෘජු සහයෝගය අත්යවශ්ය බවත් අමාත්යවරයා අවධාරණය කරයි.
නියෝජ්ය අමාත්යවරයා සිය ෆේස්බුක් සටහනක් මගින් පෙන්වා දෙන්නේ නාගරික වැසියන් සහ ව්යාපාරිකයින් සිය දෛනික අපද්රව්ය විධිමත් පරිදි බැහැර කරමින්, ජල මූලාශ්රයන්ට හානි නොවන අයුරින් වගකීමෙන් යුතුව කටයුතු කරන්නේ නම්, පිරිසිදු බේරේ වැවක් සහ හරිතවත් ශ්රී ලංකාවක් ගොඩනැඟීමේ ජාතික අරමුණ වෙත පහසුවෙන් ලඟා විය හැකි බවයි.
අපද්රව්ය, අපජලය සහ නාගරික කුණු වැවට එකතු වීම නිසා ඇල්ගී සහ සයනොබැක්ටීරියා පැතිරී වැවේ පවතින ස්වභාවික සුන්දරත්වය ගිලිහී ගොස් ඇති බවත්, මෙය අවට ජීවත් වන සහ කොළඹට පැමිණෙන ජනතාවට දැඩි අපහසුතාවක් බවත් ඔහු සිහිපත් කරයි.
මේ සම්බන්ධයෙන් විසඳුම් ලබා දීම සඳහා වරාය අධිකාරිය සහ ඉඩම් සංවර්ධනය කිරීමේ සංස්ථාව එක්ව කටයුතු කරන අතර, ඒ යටතේ දැනටමත් වැවේ ස්ථාන 35ක ජලයේ තත්ත්වය පිළිබඳ පරීක්ෂණ සිදු කර ඇත.
