ශ්රී ලංකා රසායනික ව්යාධිවේදීන්ගේ විද්යායතනයේ (CCPSL) 11 වැනි වාර්ෂික අධ්යයන සැසිය සෞඛ්ය හා ජනමාධ්ය අමාත්ය වෛද්ය නලින්ද ජයතිස්ස මහතාගේ ප්රධානත්වයෙන් කොළඹදී පැවැත්විණි. “පුද්ගලාරෝපිත වෛද්ය විද්යාවේ යුගයේ ගුණාත්මකභාවය, නවෝත්පාදනය සහ අන්තර් විෂය සහයෝගීතාවය” යන තේමාව යටතේ මෙම සමුළුව සංවිධානය කර තිබුණි.
සමාරම්භක උත්සවයේදී අදහස් දැක්වූ අමාත්යවරයා අවධාරණය කළේ, සායනික රසායනාගාරය යනු සරල උපකාරක සේවාවක් නොව රෝගී සත්කාරයේ ප්රධාන කුළුණක් බවයි. සෑම රසායනාගාර වාර්තාවක් පිටුපසම මිනිස් ජීවිතයක් පවතින බවත්, රෝග විනිශ්චය සහ ප්රතිකාර නිරීක්ෂණය සඳහා එහි කාර්යභාරය අතිශය තීරණාත්මක බවත් ඔහු පෙන්වා දුන්නේය.
සෞඛ්ය ක්ෂේත්රයේ ප්රගතිය උදෙසා අමාත්යවරයා අවධාරණය කළේ රසායනාගාර සේවාවක පදනම ගුණාත්මකභාවය වන බවත්, අභ්යන්තර තත්ත්ව පාලනය සහ නිවැරදි වාර්තාකරණය රෝගී ආරක්ෂාව තහවුරු කරන ප්රධාන පියවරක් බවත්ය. ඩිජිටල් සෞඛ්ය, කෘතිම බුද්ධිය සහ අණුක රෝග විනිශ්චය හරහා ක්ෂේත්රය වේගයෙන් වෙනස් වන බවත්, වාර්තා ලබාදීමේ කාලය අඩු කිරීම සහ විද්යාගාර අතර ඩිජිටල් සබඳතා ගොඩනැඟීම මඟින් සේවාවන් ශක්තිමත් කළ හැකි බවත් ඔහු පැවසීය.
දියවැඩියාව, පිළිකා සහ හෘද රෝග වැනි බෝ නොවන රෝග පාලනයට වෛද්යවරුන්, ව්යාධිවේදීන් සහ සෙසු වෘත්තිකයන් එක්ව කණ්ඩායමක් ලෙස වැඩ කිරීමේ වැදගත්කම ඔහු පෙන්වා දුන් අතර, ආර්ථික අභියෝග හමුවේ වුවද අඛණ්ඩව පවත්වාගෙන යා හැකි විද්යාගාර සේවාවක් රටේ උපායමාර්ගික ආයෝජනයක් බවද වැඩිදුරටත් සඳහන් කළේය.
සමුළුවේදී CCPSL ශිෂ්යත්ව ප්රදානය කිරීමක් ද සිදු වූ අතර, මහාචාර්ය පීටර් එම්. ස්ටුවර්ට් මහතා සහ අභාවප්රාප්ත වෛද්ය එස්. ඩී. අතුකෝරල මහතා වෙනුවෙන් මරණින් පසු පිරිනමන ශිෂ්යත්වය ද මෙහිදී පිරිනැමින.
