වාහන ආනයනය සඳහා සීමා පැනවීම මඟින් වෙළඳපොල තුළ දැඩි සංකූලතා ඇතිවීමේ අවදානමක් පවතින බව ආර්ථික විශ්ලේෂක ධනනාත් ප්‍රනාන්දු මහතා පවසයි. ලබන අගෝස්තු 15 වැනිදායින් පසු පවතින වාහන ආනයන ප්‍රතිපත්තිය දීර්ඝ කරන්නේද නැද්ද යන්න පිළිබඳව රජය ගන්නා තීරණය මෙම තත්ත්වය සම්බන්ධයෙන් තීරණාත්මක වනු ඇත.
අන්තර්ජාතික මූල්‍ය අරමුදලේ එකඟතාවලට අනුව අමතර අධිභාර පැනවීමට ඉඩක් නොමැති වුවද, රජය එම අධිභාර හදිසියේ ඉවත් කළහොත් වෙළෙඳපොළ තුළ යම් කම්පනයක් ඇතිවීමේ ඉඩකඩක් පවතින බව ඒ මහතා පෙන්වා දෙයි. විශේෂයෙන්ම, වාහන ආනයන සීමා සම්බන්ධයෙන් රජය ගන්නා තීරණ මත පදනම්ව ආනයනකරුවන් නැවත වරක් කලබලයෙන් ණයවර ලිපි (LC) විවෘත කිරීමට පෙළඹිය හැකි වීම මීට ප්‍රධාන හේතුවයි.
පසුගිය කාල වකවානුවේ පැවති දැඩි වාහන ඉල්ලුම මේ වන විට බොහෝ දුරට සපුරා ඇති බවත්, ආනයනකරුවන් ද අවශ්‍ය ප්‍රමාණයට වාහන ගෙන්වා ඇති බැවින් වාහන ලියාපදිංචිය ක්‍රමයෙන් අඩුවෙමින් පවතින බවත් ප්‍රනාන්දු මහතා පෙන්වා දෙයි. මෙම තත්ත්වය තුළ පසුගිය වසරට සාපේක්ෂව මෙවර වාහන ආනයනයෙන් ලැබෙන බදු ආදායම පහත වැටෙනු ඇති බව ඔහු පුරෝකථනය කරයි.
දැනටමත් වාහන සඳහා 150% ක් සහ 200% ක් වැනි ඉහළ තීරුබදු අය කරන බැවින් තවදුරටත් එවැනි බදු පැනවීම අසාධාරණ බව පවසන ධනනාත් ප්‍රනාන්දු මහතා, රජය එකම පිරිසකගෙන් දිගින් දිගටම බදු අය කර ඔවුන් වෙහෙසට පත් නොකර, රාජ්‍ය වියදම් නිසි ලෙස කළමනාකරණය කර ගැනීමේ වැදගත්කම අවධාරණය කරයි. එසේම, ආර්ථික වර්ධනය උදෙසා අත්‍යවශ්‍ය ප්‍රතිසංස්කරණ කඩිනම් කිරීම හරහා ආදායම් වර්ධනය කර ගැනීමටත්, ඒ තුළින් වෙළෙඳපොළට ස්ථාවර ආර්ථික සංඥාවක් ලබා දීමටත් රජය පියවර ගත යුතු බව ඔහු වැඩිදුරටත් සඳහන් කළේය.
