බලහත්කාර ශ්රමය භාවිතයෙන් නිෂ්පාදනය කරන ලද භාණ්ඩ ආනයනය කිරීම තහනම් කරමින් නිකුත් කර ඇති නවතම ගැසට් නිවේදනය ක්රියාත්මක කිරීම සඳහා අවශ්ය නිල උපදෙස් මාලාව ලැබෙන තෙක් අපේක්ෂාවෙන් පසුවන බව ශ්රී ලංකා රේගුව පවසයි.
ජනාධිපති අනුර කුමාර දිසානායක මහතා විසින් මුදල්, ක්රමසම්පාදන හා ආර්ථික සංවර්ධන අමාත්යවරයා ලෙස ජූලි 10 වැනිදා දිනැතිව මෙම ගැසට් නිවේදනය නිකුත් කරනු ලැබීය. ඒ අනුව, ජූලි 10 වැනිදා සිට ක්රියාත්මක වන පරිදි බලහත්කාර ශ්රමය භාවිතයෙන් නිෂ්පාදනය කර හෝ නිමවා ඇති ඕනෑම භාණ්ඩයක් ආනයනය කිරීම තහනම් වේ.
මෙම රෙගුලාසි බලාත්මක කිරීමේදී රේගු අධ්යක්ෂ ජනරාල්වරයා ප්රධාන නියාමන අධිකාරිය ලෙස කටයුතු කරන අතර, රේගු අධ්යක්ෂ ජනරාල්වරයාට මේ සඳහා අවශ්ය දෙපාර්තමේන්තුමය නියෝග නිකුත් කිරීමේ සහ පරිපාලන ක්රියාපටිපාටීන් සකස් කිරීමේ පූර්ණ බලය හිමිව ඇත.
ගැසට් නිවේදනයට අනුව, භාණ්ඩ ආනයනකරුවන් විසින් අදාළ භාණ්ඩ බලහත්කාර ශ්රමය මගින් නිෂ්පාදනය කර නොමැති බව තහවුරු කිරීමට අවශ්ය ලේඛන රේගු අධ්යක්ෂ ජනරාල්වරයා වෙත ඉදිරිපත් කළ යුතුය. ජාත්යන්තර කම්කරු සංවිධානයේ තීරණ සැළකිල්ලට ගනිමින්, මෙම රෙගුලාසි අදාළ විය යුතු විශේෂිත භාණ්ඩ හෝ රටවල් සම්බන්ධයෙන් අමාත්යවරයා විසින් ඉදිරියේදී නිවේදනය කිරීමට නියමිතය.
පසුගිය කාලයේ බලහත්කාර ශ්රම භාවිතයෙන් නිෂ්පාදිත භාණ්ඩ ආනයනය වැළැක්වීමට ප්රමාණවත් පියවර නොගැනීම හේතුවෙන්, ශ්රී ලංකාව ඇතුළු රටවල් 60කට සියයට 12.5ක අතිරේක ආනයන බද්දක් පැනවීමට ඇමෙරිකානු රජය යෝජනා කර තිබූ පසුබිමක මෙම පියවර ගෙන තිබේ.
