මෙරට රෝහල් පද්ධතියේ පවතින උග්ර හෙද හිඟයට කඩිනම් පිළියමක් ලෙස, විශ්රාම යෑමට ආසන්න සියලුම හෙද හෙදියන්ගේ විශ්රාම වයස් සීමාව වසර දෙකකින් දීර්ඝ කරන ලෙස රාජ්ය සේවා එක්සත් හෙද සංගමයේ සභාපති පූජ්ය මුරුත්තෙට්ටුවේ ආනන්ද හිමියන් රජයෙන් ඉල්ලීමක් කරති. මේ සම්බන්ධයෙන් වන ලිඛිත ඉල්ලීමක් උන්වහන්සේ විසින් ජනාධිපති අනුර කුමාර දිසානායක මහතා වෙත පසුගිය 14 වැනිදා යොමු කර තිබේ.
ඩෙංගු රෝගීන්ගේ සංඛ්යාව 70,000 ඉක්මවා ගොස් ඇති වත්මන් වාතාවරණය තුළ රෝගීන්ට උපස්ථාන කිරීමට ප්රමාණවත් හෙද කාර්ය මණ්ඩලයක් නොමැති වීම බරපතළ තත්ත්වයක් බව මුරුත්තෙට්ටුවේ ආනන්ද හිමියන් පෙන්වා දෙයි. රජය විසින් නවක හෙදියන් බඳවා ගැනීමට පියවර ගත්තද, ඔවුන්ගේ පුහුණු කාලසීමාව හේතුවෙන් සේවයට එක්වීමට තවත් වසර තුනක් පමණ ගතවීම නිසා දැනට පවතින හෙද නිලධාරීන් මත තිදෙනෙකුගේ වැඩ කොටසක් පැටවී ඇති බව උන්වහන්සේ සඳහන් කළහ.
මෙම අසීමිත සේවා පීඩනය නිසා හෙද නිලධාරීන් රෝගී වීමේ ප්රවණතාවක් පවතින බවත්, එම අර්බුදය සමනය කිරීම සඳහා විශ්රාම වයස දීර්ඝ කිරීමේ තීරණයට ජනාධිපතිවරයාගේ සෘජු අවධානය යොමු කරනු ඇතැයි තමන් අපේක්ෂා කරන බවත් උන්වහන්සේ සිය ලිපිය මගින් වැඩිදුරටත් අවධාරණය කර ඇත.
