සමගි ජන සන්ධානය (SJB) නියෝජනය කරන මෙරට ප්රධාන පෙළේ ද්රවිඩ සහ මුස්ලිම් දේශපාලන පක්ෂ 6ක් ඒකාබද්ධව පොදු වේදිකාවක් නිර්මාණය කරගනිමින් රජයට බලපෑම් කිරීමට තීරණය කිරීම, ඉදිරි දේශපාලන සන්දර්භය තුළ ප්රධාන විපක්ෂයට එල්ල වන බරපතළ තර්ජනයක් බව දේශපාලන විචාරකයෝ පෙන්වා දෙති. පවතින උපායමාර්ගික දේශපාලන තත්ත්වය මත, එළඹෙන පළාත් සභා මැතිවරණයේදී විපක්ෂයේ ඡන්ද පදනම තවදුරටත් බෙදී යාමේ ලක්ෂණ මේ හරහා ප්රකට වන බව දේශපාලන අංශ සනාථ කරයි. ශ්රී ලංකා මුස්ලිම් කොංග්රසය, සමස්ත ලංකා මුස්ලිම් කොංග්රසය, ඉලංකෙයි තමිල් අරුසු කච්චි, ලංකා කම්කරු කොංග්රසය, ප්රජාතන්ත්රවාදී දෙමළ ජාතික සන්ධානය සහ දෙමළ ප්රගතිශීලි සන්ධානය යන පක්ෂ මෙලෙස ඒකාබද්ධව කටයුතු කිරීමට තීරණය කර ඇත.
මෙම නව දේශපාලන බලවේගය පිහිටුවා ගත් පක්ෂ නියෝජිතයින් අවධාරණය කරන්නේ, තමන් මේ දක්වා සමගි ජන සන්ධානයෙන් නිල වශයෙන් ඉවත් වී නොමැති වුවද, තම අනන්යතාවන් සහ ඉල්ලීම් සම්බන්ධයෙන් සන්ධානය තුළින් නිසි ප්රතිචාරයක් නොලැබීම හේතුවෙන් මෙම තීරණය ගත් බවයි. විශේෂයෙන්ම වත්මන් ජාතික ජන බලවේග (NPP) ආණ්ඩුව තමන්ගෙන් දේශපාලන සහයෝගයක් ඉල්ලා සිටින්නේ නම් එය සලකා බැලීමට සූදානම් බව ප්රකාශ කරන ඔවුන්, ආණ්ඩුව සතු පාර්ලිමේන්තු බලය අභිබවා යාමට තමන්ට අවශ්යතාවක් නොමැති බව ද පවසති. ඒකාබද්ධ මාධ්ය හමුවකදී අදහස් දැක්වූ හිටපු පාර්ලිමේන්තු මන්ත්රී එම්.ඒ. සුමන්තිරන් මහතා සඳහන් කළේ, බලයට පත් වී වසරක් ඇතුළත පළාත් සභා මැතිවරණය පවත්වන බවට ආණ්ඩුව දුන් ප්රතිඥාව ඉටු කරන ලෙස බල කිරීමට මෙන්ම සංහිඳියාව හා සුළුතර අයිතිවාසිකම් වෙනුවෙන් මෙම පොදු වේදිකාව හරහා අඛණ්ඩව කටයුතු කරන බවයි.
