ශ්රී ලංකා පොදුජන පෙරමුණේ ජාතික සංවිධායක පාර්ලිමේන්තු මන්ත්රී නාමල් රාජපක්ෂ මහතා පවසන්නේ, වර්තමානයේ සෑම බන්ධනාගාරයකම ධාරිතාව ඉක්මවා රැඳවියන් සිටින බවයි. නෙළුම් මාවතේ පිහිටි පක්ෂ මූලස්ථානයේදී පැවති මාධ්ය හමුවකදී ඔහු මේ බව සඳහන් කළේය.
රැඳවියන් අටසියයකට පමණක් පහසුකම් ඇති බන්ධනාගාරවලට හාරදහසක් පමණ රැඳවියන් දැමීම හේතුවෙන් බන්ධනාගාර තුළ දැඩි තදබදයක් නිර්මාණය වී ඇති බවත්, ආණ්ඩුව තම දේශපාලන වාසි ලබාගැනීම සඳහා මාධ්ය සංදර්ශන පවත්වමින් දිනෙන් දින පුද්ගලයින් රක්ෂිත බන්ධනාගාරගත කරන බවත් මන්ත්රීවරයා පවසයි. මත්ද්රව්ය සම්බන්ධ නඩුවලදී රස පරීක්ෂක වාර්තා නිකුත් වීමට වසර ගණනාවක් ගතවීම හේතුවෙන්, කිසිදු වරදක් නැති පුද්ගලයින් පවා දීර්ඝ කාලයක් රක්ෂිත බන්ධනාගාරයේ රැඳී සිටීමට සිදුවී ඇති බවත්, එය බන්ධනාගාර තදබදයට ප්රධාන හේතුවක් බවත් ඔහු සඳහන් කළේය.
එමෙන්ම මත්ද්රව්යවලට ඇබ්බැහි වූවන් පුනරුත්ථාපනය කිරීමට පියවර නොගැනීම සහ සියලු දෙනාම බන්ධනාගාරගත කිරීම ගැටලුවක් බවත්, බන්ධනාගාරවල යටිතල පහසුකම් දියුණු කිරීම හෝ අවශ්ය කාර්ය මණ්ඩල බඳවා ගැනීම සිදු නොකරන බවට ද ඔහු ආණ්ඩුවට චෝදනා කළේය. තම පක්ෂයේ මන්ත්රීවරුන් සහ රාජ්ය නිලධාරීන් බන්ධනාගාර වෙත යන විට, සිරගත කර සිටින ත්රිවිධ හමුදා, පොලිස් සහ බුද්ධි අංශ සාමාජිකයන් මුහුණ දෙන අසීරු තත්ත්වයන් දැකගැනීමට ලැබෙන බව ඔහු වැඩිදුරටත් කියා සිටියේය.
මෙම තත්ත්වයට ආණ්ඩුව වගකිව යුතු බවත්, දේශපාලන අරමුණු ඉටු කර ගැනීමට මිනිසුන් බන්ධනාගාරගත කිරීම වෙනුවට වගකීමෙන් යුතුව කටයුතු කළ යුතු බවත් නාමල් රාජපක්ෂ මහතා අවධාරණය කළේය.
