ශ්රී ලංකා ගුවන් හමුදාවේ 9 වැනි ගුවන් හමුදාපතිවරයා වූ එයාර් චීෆ් මාර්ෂල් ඔලිවර් රණසිංහ මහතා විසින් රචිත “To Survive as One Nation, One People” (එක් ජාතියක්, එක් ජනතාවක් ලෙස පැවැත්ම උදෙසා) නමැති ස්වයංචරිතාපදානය ඊයේ (16) කොළඹ කිංස්බරි හෝටලයේදී උත්කර්ෂවත් අන්දමින් දොරට වඩින ලදී. ඒ මහතාගේ දශක තුනකට අධික දීර්ඝ මෙන්ම අභියෝගාත්මක ගුවන් හමුදා ජීවිතය තුළ ලැබූ සුවිශේෂී අත්දැකීම්, මෙහෙයුම් දායකත්වයන් සහ පෞද්ගලික මතකයන් රැසක් මෙම කෘතිය ඔස්සේ සාකච්ඡාවට බඳුන් කර ඇත. මෙම සුවිශේෂී අවස්ථාවට ගුවන් හමුදා මාර්ෂල් රොෂාන් ගුණතිලක සහ වත්මන් ගුවන් හමුදාපති එයාර් මාර්ෂල් බන්දු එදිරිසිංහ යන මහත්වරුන් ඇතුළු ත්රිවිධ හමුදාවේ හිටපු හමුදාපතිවරුන්, උසස් රාජ්ය නිලධාරීන් සහ ජ්යෙෂ්ඨ හමුදා නිලධාරීන් රැසක් සහභාගී වූහ.
සර්ජන්ට් ගුවන් නියමුවෙකු (Sergeant Pilot) ලෙස සේවයට බැඳී, ගුවන් හමුදාවේ ඉහළම තනතුර වන ගුවන් හමුදාපති ධූරය දක්වා කැපී පෙනෙන ගමනක නිරත වූ රණසිංහ මහතාගේ සේවා කාලය, මෙරට ඉතිහාසයේ අතිශය අභියෝගාත්මක මෙහෙයුම් රැසකින් සමන්විත වූවකි. විශේෂයෙන්ම, 1985 වසරේ බ්රිතාන්ය අගමැතිනි මාග්රට් තැචර් මහත්මියගේ මෙරට සංචාරය අතරතුර, දැඩි අවදානමක් ගනිමින් යාපනය කොටුවේ සිරවී සිටි සෙබළුන් 250 දෙනෙකු බේරාගැනීම සඳහා දියත් කළ ඓතිහාසික රාත්රී මෙහෙයුම ඉන් ප්රධාන තැනක් ගනී. එමෙන්ම, 1995 වසරේදී දකුණු සහ ගිනිකොනදිග ආසියාවේ ප්රථම වරට, නිරවද්ය ඉලක්ක හඳුනාගැනීම සඳහා නියමුවන් රහිත ගුවන් යානා (UAV) මෙරට ආරක්ෂක සේවා වෙත හඳුන්වා දීමට කටයුතු කළේ ද ඔහුගේ දූරදර්ශී අණදීම යටතේය.
මෙම කෘතිය මඟින් මෙතෙක් අනාවරණය නොවූ සුවිශේෂී ගුවන් හමුදා මෙහෙයුම් පිළිබඳ තොරතුරු මෙන්ම, රටේ වර්තමානය සහ අනාගතය පිළිබඳව ඔහු සතු පරිණත ආවර්ජනයන් ද ඉදිරිපත් කර තිබේ. හමුදාමය ඉතිහාසය, යුද උපායමාර්ග සහ ජාතික ආරක්ෂක ප්රතිපත්ති පිළිබඳව හදාරන්නන්ට මෙන්ම අනාගත පරපුරට ද මෙවැනි ජ්යෙෂ්ඨ නිලධාරීන්ගේ අත්දැකීම් අඩංගු ග්රන්ථ පරිශීලනය කිරීම මහඟු පිටිවහලක් වන බව ආරක්ෂක විශ්ලේෂකයෝ පෙන්වා දෙති. දේශයේ ස්වෛරීභාවය වෙනුවෙන් දිවිහිමියෙන් කැපවූ රණවිරුවන්ගේ සැබෑ මෙහෙවර සහ ඉතිහාසය නිවැරදිව ලේඛනගත කිරීම ජාතික වගකීමක් වන බව දේශපාලන හා ආරක්ෂක විචාරකයෝ සන්කල්පනය කරති.
