ආර්ථිකය නැවත ස්ථාවර කිරීමත් දේශගුණික විපර්යාස හේතුවෙන් ශ්රී ලංකාව මුහුණ දෙන අභියෝග ජය ගැනීමට ලෝකයේ රටවල් එක්ව කටයුතු කළයුතු යැයි චීනයේ පැවති 5 වැනි ටිබෙට් (Xizang) ට්රාන්ස්-හිමාලයා ජාත්යන්තර සහයෝගීතා සංසදයේදී ප්රවාහන, මහාමාර්ග හා නාගරික සංවර්ධන අමාත්ය බිමල් රත්නායක මහතා අවධාරණය කර ඇත.
ජූලි 16දා සිට 18 දක්වා චීනයේ ලින්ෂි නගරයේ පැවති මෙම සංසදය සඳහා මියන්මාරයේ උප ජනාධිපති, නේපාල නියෝජිත මන්ත්රී මණ්ඩලයේ නියෝජ්ය කථානායක, පාකිස්තානයේ දේශගුණික විපර්යාස ඇමැතිවරයා ඇතුළු රටවල් රැසක ඉහළ පෙළේ නියෝජිතයන් සහභාගී වූ අතර, ඇමැති බිමල් රත්නායක මහතා එහි ප්රධාන දේශකයකු ලෙස අදහස් දැක්වීය.
“මිනිසා සහ ස්වභාවධර්මය අතර සහජීවනය – සංවර්ධනයේ ප්රතිලාභ හවුලේ බෙදා ගැනීම” යන තේමාව යටතේ පැවති මෙම සංසදයේදී, පරිසරය ආරක්ෂා කරමින් ආර්ථික සංවර්ධනය ළඟා කර ගන්නේ කෙසේද යන්න පිළිබඳව විශේෂ අවධානය යොමු කෙරිණි.
ට්රාන්ස්-හිමාලයා කලාපයේ රටවල් වෙන් කරන බාධක ලෙස නොව, එකිනෙකා සමීප කරන පාලම් ලෙස කඳු පද්ධති දැකිය යුතු බව පෙන්වා දුන් ඇමැතිවරයා, ජනාධිපති අනුර කුමාර දිසානායක මහතාගේ නායකත්වය යටතේ ශ්රී ලංකාව චීනය සමඟ පවත්වාගෙන යන මිත්රශීලී සබඳතා තවදුරටත් ශක්තිමත් කිරීමටත්, එක් චීන ප්රතිපත්තිය සහ බෙල්ට් ඇන්ඩ් රෝඩ් වැඩපිළිවෙළ සඳහා ශ්රී ලංකාවේ අඛණ්ඩ සහයෝගය ලබා දීමටත් කැපවී සිටින බව යළි තහවුරු කළේය.
ප්රවාහනය, සැපයුම් කළමනාකරණය, ඩිජිටල් ආර්ථිකය, තිරසර සංචාරක ව්යාපාරය සහ හරිත බලශක්තිය යන ක්ෂේත්රවල ශ්රී ලංකාව සහ චීනය අතර සහයෝගීතාව පුළුල් කළ හැකි බව සඳහන් කළ අමාත්යවරයා, ආර්ථිකය නඟාසිටුවීමේ සිට දේශගුණික විපර්යාස දක්වා අද ලෝකය මුහුණ දෙන අභියෝග කිසිම රටකට තනිව ජය ගත නොහැකි බැවින් සියලු රටවල් එකට එක්ව කටයුතු කළ යුතු බව අවධාරණය කළේය.
මෙම සංසදයට සමගාමීව ඇමැතිවරයා ටිබෙට් ස්වාධීන කලාපීය පක්ෂ කමිටුවේ ස්ථාවර කමිටු සාමාජික ෂූ ෂිවෙන් (Xu Zhiwen) මහතා සමඟ ද සාකච්ඡා පවත්වා ඇති අතර, ශ්රී ලංකා – චීන පාර්ලිමේන්තු මිත්රත්ව සංගමයේ ලේකම් පාර්ලිමේන්තු මන්ත්රී ලක්මාලි හේමචන්ද්ර සහ අමාත්යාංශ නිලධාරිනී මල්කාන්ති ජයරත්න යන මහත්මීහු ද මෙම සංචාරයට එක්ව සිටියහ.
