ලෝකප්රකට කෝටිපති එලොන් මස්ක් නැවත වරක් මුළු තාක්ෂණික ලෝකයම උඩුයටිකුරු කරන ජාතියේ ප්රකාශයක් සිදු කර තිබෙනවා. ඔහුගේ සුප්රසිද්ධ සමාගම් දෙක වන ටෙස්ලා සහ ස්පේස්එක්ස් එකට ඒකාබද්ධ කිරීමට ඇති ඉඩකඩ ගැන පළවූ රූමර්ස් මුළුමනින්ම ඉවත් නොකරමින් ඔහු කළ කතාවයි මෙසේ අන්තර්ජාලය පුරා ලැව්ගින්නක් සේ පැතිර යන්නේ.
ටෙස්ලා හි අලුත්ම ආදායම් වාර්තාව පිළිබඳ පැවැති විශේෂ සාකච්ඡාවේදී මස්ක් සඳහන් කර ඇත්තේ මෙම සමාගම් දෙක අතර පවතින සබඳතා සහ සහයෝගිතාවන් දිනෙන් දිනම වර්ධනය වන බවයි. ස්පේස්එක්ස්හි ඇතැම් ව්යාපෘති සඳහා ටෙස්ලා බැටරි ලබා දීම සහ ‘Terafab’ නම් AI චිප්ස් නිෂ්පාදන මධ්යස්ථානය එකතුව සංවර්ධනය කිරීම ඊට හොඳම උදාහරණ ලෙස පෙන්වා දිය හැකියි.
නමුත් එකවරම සමාගම් දෙක ඒකාබද්ධ කිරීම ගැන කෙළින්ම කතා කරන්න බැරි බවත්, ඒ සඳහා නිසි ක්රියාපටිපාටියක් අනුගමනය කළ යුතු බවත් කියමින් මස්ක් ලොකු කුතුහලයක් ඉතිරි කළා. මේ ප්රකාශයත් සමඟම ආයෝජකයින් සහ තාක්ෂණික ක්ෂේත්රයේ ප්රවීණයන් අතර ලොකු කලබලයක් හටගෙන තිබෙනවා.
Deepwater Asset Management හි කළමනාකාර සහකරු ජීන් මුන්ස්ටර් පවසන්නේ ඉදිරි වසර කිහිපය තුළ මෙම සමාගම් දෙක එකිනෙක හා සම්බන්ධ වීමට ඇති ඉඩකඩ ඉතා ඉහළ බව මස්ක්ගේ කතාවෙන් තහවුරු වූ බවයි. එමෙන්ම JPMorgan විශ්ලේෂකයින් ද පෙන්වා දෙන්නේ දැනටමත් මෙම ආයතන දෙක අතර මෙහෙයුම් සම්බන්ධතාවය අතිශය දැඩි මට්ටමක පවතින බවයි.
කෙසේ වෙතත්, මෙම ඒකාබද්ධ වීමට අතිදැවැන්ත බාධක ඇති බවයි තවත් පිරිසක් පෙන්වා දෙන්නේ. ස්පේස්එක්ස් හි අමෙරිකානු රජයේ සබඳතා නිසා ඇතිවන ජාතික ආරක්ෂක ගැටලු හේතුවෙන් චීනය වැනි රටවලින් නියාමන අනුමැතීන් ලබා ගැනීම ලෙහෙසි වන්නේ නැහැ.
එසේම ටෙස්ලා සමාගමට වඩා ස්පේස්එක්ස්හි මස්ක් සතුව විශාල ඡන්ද බලයක් පවතින නිසා, එය පොදු කොටස් හිමියන්ගේ තීරණ සංකීර්ණ කිරීමටද හේතුවක් විය හැකි බවයි කියැවෙන්නේ.
මෙම අතිදැවැන්ත සමාගම් දෙක එකතු වී අනාගත ලෝකය වෙනස් කරන අලුත්ම තාක්ෂණික විප්ලවයක් සිදු කරාවිද? ඔබේ අදහසත් අපට කියන්න.
