නීතිවිරෝධී ලෙස මෙරටට රැගෙන ආ රුපියල් 3,431,400ක වටිනාකමකින් යුත් විදේශීය පරවියන් 64 දෙනෙකු සමඟ ශ්රී ලාංකිකයින් දෙදෙනෙකු කටුනායක බණ්ඩාරනායක ජාත්යන්තර ගුවන්තොටුපොළේදී ගුවන්තොටුපොළ රේගු නිලධාරීන් විසින් අත්අඩංගුවට ගෙන තිබේ. වෙන්නප්පුව ප්රදේශයේ පදිංචි 30 හැවිරිදි වියේ පසුවන සුරතල් සතුන් අලෙවි කිරීමේ වෙළඳසැල් පවත්වාගෙන යන ව්යාපාරිකයින් දෙදෙනෙකු මෙලෙස අත්අඩංගුවට පත්ව ඇති අතර, ඔවුන් ඊයේ (25) රාත්රී කාලයේදී ගුවන්තොටුපොළ පැමිණීමේ පර්යන්තයේ කිසිවක් ප්රකාශ කිරීමට නොමැති හරිත මාවත ඔස්සේ මෙම සතුන් රැගෙන යාමට උත්සාහ කර ඇති බව රේගුව සඳහන් කරයි.
ඉතාලියෙන් මිලදී ගන්නා ලද අදාළ පරවියන් ඩුබායි හරහා කටුනායක ගුවන්තොටුපොළ වෙත රැගෙනවිත් ඇත්තේ කුඩා යකඩ කූඩු තුළ බහා තමන් රැගෙන ආ ගමන් මලු 06ක් තුළ සඟවා ගනිමිනි. ශ්ර්රී ලංකාවේ වනජීවී සහ වෘක්ෂලතා ආඥා පනතේ විධිවිධාන මෙන්ම සත්ත්ව නීරෝධායන නීතිරීති පද්ධතියද දැඩි ලෙස උල්ලංඝනය කරමින් මෙම සතුන් ප්රවාහනය කර ඇති බව මූලික විමර්ශනවලදී අනාවරණය වී ඇත.
සිද්ධිය සම්බන්ධයෙන් කටුනායක ගුවන්තොටුපොළ රේගු අංශය විසින් වැඩිදුර විමර්ශන කටයුතු ක්රියාත්මක කරනු ලබන අතර, නීතිමය ක්රියාමාර්ගවලින් අනතුරුව අදාළ පරවියන් යළි ඉතාලිය වෙතම රැගෙන යාම සඳහා භාරදීමට නියමිතය. වනජීවී සහ සත්ත්ව ආනයන නීති කඩ කරමින් මෙවැනි නීතිවිරෝධී සත්ත්ව ජාවාරම් සිදුකිරීමට එරෙහිව රේගු සහ ආරක්ෂක අංශ විසින් නිරන්තරයෙන් දැඩි නීතිමය ක්රියාමාර්ග අනුගමනය කරනු ලබයි.
