බලහත්කාර ශ්රම භාවිතය සම්බන්ධයෙන් චීන භාණ්ඩ මත පැනවූ නව ඇමරිකානු තීරුබදු අන්යාය සහගත වන අතර එය ආරක්ෂණවාදයට සමාන බව පවසන චීන වාණිජ අමාත්යාංශය, වොෂින්ටන් නගරයෙන් ඉල්ලා සිටින්නේ එම තීරුබදු වහාම ඉවත් කරන ලෙසයි.
යුරෝපා සංගමය සහ චීනය ඇතුළු වෙළඳ හවුල්කරුවන් 60 දෙනෙකුගේ භාණ්ඩ මත බලහත්කාර ශ්රම ආනයන පාලනය කිරීමට අපොහොසත් වී ඇති බවට චෝදනා කරමින් ඇමරිකාව විසින් පසුගිය සිකුරාදා 10%ක සහ 12.5%ක නව තීරුබදු පනවනු ලැබූ අතර, ඒ යටතේ චීනයට 12.5%ක බද්දක් හිමි විය.
චීන වාණිජ අමාත්යාංශය ප්රකාශ කළේ ඇමරිකාව දිගින් දිගටම ‘බලහත්කාර ශ්රම’ කාරණය හැසිරවීම ඒකපාර්ශ්විකවාදයේ සහ ආරක්ෂණවාදයේ සාම්ප්රදායික ක්රියාවක් බවයි.
එසේ වුවද, අන්යෝන්ය ගෞරවය, සමානාත්මතාවය සහ අන්යෝන්ය ප්රතිලාභ මත පදනම්ව ගැටලු විසඳා ගැනීම සඳහා අඛණ්ඩව සංවාදවල නිරත වීමට සූදානම් බවද චීනය පෙන්වා දී ඇත.
මෙම නව තීරුබදු පියවරයන් හේතුවෙන් පසුගිය වසරේ ලෝකයේ විශාලතම ආර්ථිකයන් දෙක අතර ඇති කරගත් බිඳෙන සුළු වෙළඳ සටන් විරාමයට බාධා එල්ල වීමේ අවදානමක් පවතියි.
