ත්රිපුද්ගල විමර්ශන කමිටුව විසින් 2015-09-30 වන දිනැතිව ප්රධාන ආරක්ෂක නිලධාරීවරයාගෙන් ලබාගෙන තිබෙන ප්රකාශයේ අදාළ මූලික විරෝධතාවය සටහන් කර ඇත්තේ මෙලෙසිනි:
“මම මූලික විරෝධතාවයක් ඉදිරිපත් කරනවා. මම දන්නා විදියට මට විරුද්ධව පැමිණිලි ඉදිරිපත් කර තිබෙන්නේ විශ්වවිද්යාල ආචාර්ය මණ්ඩලය විසින්. එහි සාමාජිකයෙකු වන මෙම මණ්ඩලයේ අසුන්ගෙන සිටින, එනම් මහාචාර්ය විජේවීර මහතා මෙම විශ්වවිද්යාලයේ ආචාර්යවරුන්ගේ සංගමයේ සාමාජිකයෙකු නිසාත්, පැමිණිල්ල එම සංගමය මගින් ඉදිරිපත් කර ඇති බැවිනුත්, මම විරුද්ධ වනවා මෙම පරීක්ෂණයට ආචාර්ය මණ්ඩලයේ අයෙක් අසුන් ගැනීම පිළිබඳව. එය ස්වාභාවික යුක්තියේ මූලධර්මවලට පටහැනි වනවා.”
එම අවස්ථාවේදී මහාචාර්ය විජේවීර මෙසේ පවසා ඇත:
“මම මෙහි පැමිණියේ මගේ අවශ්යතාවයට නොවේ. විශ්වවිද්යාලයේ පාලක සභාව විසින් මා මෙම සභාවට පත් කර මට මෙහි පැමිණෙන ලෙස දැන්වූ නිසායි. මම අද ඉටු කරන්නේ පාලක සභාව විසින් එවන ලද ඉල්ලීමයි. මම දන්ත වෛද්ය පීඨයේ ආචාර්ය සංගමයේ සාමාජිකයෙක්. එමෙන්ම සෑම ආචාර්යවරයෙක්ම ආචාර්ය සංගමයේ සාමාජිකයෙක්.”
සභාපති විනිශ්චය සභාවේ තීරණය ලබාදී ඇත්තේ මෙසේය:
“මෙය නඩු විමසීමක් නොවේ. නඩු විමසීමකදී නම් ඔබ කියන තර්කය නිවැරදියි. නමුත් මෙයින් සිදු කරන්නේ කරුණු සොයා බැලීමක් පමණයි. අප සිදු කරන්නේ පාලක සභාවේ ඉල්ලීමයි. එම නිසා අප සිතන්නේ ඔබගේ ඉල්ලීමට පදනමක් නැති බවයි. ඒ අනුව විමර්ශන සභාව ඔහුගෙන් විමසීම ඉදිරියට කරගෙන යනු ලැබේ.”
මහාචාර්ය විජේවීරගේ පිළිගැනීමට අනුව අදාළ මූලික විරෝධතාවය සාධාරණ පදනමකින් යුක්ත වන බව බැලූ බැල්මට පෙනී යා යුතුව තිබුණි. ඒ අනුව විචක්ෂණශීලී ලෙස කටයුතු කළේ නම් සිදු කළ යුතුව තිබුණේ අදාළ මූලික විරෝධතාවය පිළිගනිමින් මහාචාර්ය විජේවීර විමර්ශන කමිටුවෙන් ඉල්ලා අස්වී හෝ ඉවත් කර විමර්ශන කටයුතු ඉදිරියට පවත්වාගෙන යාමය. ඒ වෙනුවට සිදු කර තිබෙන්නේ සාධාරණ පදනමකින් තොරව මූලික විරෝධතාවය නිෂ්ප්රභ කර විමර්ශන කටයුතු ඉදිරියට පවත්වාගෙන යාමට තීරණය කිරීමය.
එකී තීරණය වැරදි බව මෙරට ඉහළම අධිකරණය වන ශ්රේෂ්ඨාධිකරණය විසින් ප්රකාශයට පත් කර තිබෙන බැවින් ඒ පිළිබඳව විග්රහයන් තවදුරටත් අවශ්ය නොවේ.
මෙම තත්ත්වය අනුව පැහැදිලි වන්නේ විගණනය නිරීක්ෂණය කළ පරිදි, නීතිඥ ලාල් විජේනායකගේ සභාපතිත්වයෙන් යුතු මූලික විමර්ශන කමිටුව විචක්ෂණශීලී නොවන, අත්තනෝමතික ක්රියාවක් මගින් පැනනැගුණාවූ මෙම නිෂ්කාර්ය වැය සඳහා වගකිවයුතු එක් ප්රධාන පාර්ශ්වයක් වන බවය.
– මතු සම්බන්ධයි
