ආර්ථික අපහසුතා හේතුවෙන් පීඩාවට පත්ව සිටින ජනතාවට සහන සැලසීම සඳහා රජය හඳුන්වා දී ඇති රුපියල් කෝටි 7170ක සමස්ත සහන පැකේජයට රජයේ මුදල් පිළිබඳ කාරක සභාවේ (COPA) අනුමැතිය හිමි වී තිබෙනවා. කාරක සභාවේ සභාපති ආචාර්ය හර්ෂ ද සිල්වා මහතාගේ ප්රධානත්වයෙන් පසුගිය 28 වන දින පාර්ලිමේන්තුවේදී පැවති රැස්වීමේදී මේ බව අනාවරණය විය.
මෙම සමස්ත රුපියල් කෝටි 7170ක මුදල ප්රධාන කොටස් දෙකකින් සමන්විත වන අතර, 2026 මැයි සහ ජූනි මාසවලදී ලබා දුන් ඉන්ධන සහනාධාර ඇතුළු සහන සඳහා වන ගෙවීම් පියවීම පිණිස නැවත වෙන් කරන ලද රුපියල් කෝටි 5280ක මුදලක් සහ අප්රේල් මාසයේ ඉන්ධන සහනාධාරය, කුඩා තේ වතු හිමියන්ගේ පොහොර සහනාධාරය සහ ධීවර සහනාධාර සඳහා ලබාගැනීම හේතුවෙන් අඩුවී තිබූ වාර්ෂික අයවැය සංචිතය නැවත පූරණය කිරීම පිණිස වෙන් කළ රුපියල් කෝටි 1890ක මුදලක් මීට ඇතුළත් වේ. ගොඩබෑමේ පිරිවැය ඉහළ යාම හේතුවෙන් ඉන්ධන අලෙවියේදී ඇතිවිය හැකි පාඩු සහ රට තුළ ඉන්ධන හිඟයක් ඇතිවීම වැළැක්වීම සඳහා වැඩිම ප්රතිපාදන ප්රමාණයක් එනම් රුපියල් කෝටි 5280ක් ඛනිජ තෙල් අංශය සඳහා වෙන් කර ඇති බව නිලධාරීහු කාරක සභාවට පැහැදිලි කළහ.
අප්රේල් මාසයේ ඉන්ධන සැපයුම්කරුවන් සඳහා ලංකා ඛනිජ තෙල් නීතිගත සංස්ථාවට රුපියල් කෝටි 1500ක් ද, ලංකා IOC සමාගමට රුපියල් කෝටි 2.34ක් ද, සයිනොපෙක් සමාගමට රුපියල් කෝටි 1.50ක් ද සහ RM Parks සමාගමට රුපියල් කෝටි 1.66ක් ද වශයෙන් සහනාධාර ලබා දී ඇත. මීට අමතරව, අස්වැසුම වැඩසටහන සඳහා රුපියල් කෝටි 8200ක්, ලංකා විදුලිබල මණ්ඩලය සඳහා රුපියල් කෝටි 1500ක්, යළ කන්නයේ කෘෂිකාර්මික කටයුතු සඳහා රුපියල් කෝටි 300ක්, කුඩා වැවිලිකරුවන් සඳහා රුපියල් කෝටි 220ක් සහ ධීවර කර්මාන්තය සඳහා රුපියල් කෝටි 120ක් ලෙස විවිධ අංශ වෙත ප්රතිපාදන වෙන් කර තිබේ.
මෙම කිසිදු ඉල්ලීමක් හරහා 2026 වසරේ සමස්ත වියදම් සීමාව හෝ ණය ගැනීමේ සීමාව ඉහළ නොයන අතර, මෙය පවතින වෙන් කිරීම් නැවත ප්රති-වෙන්කිරීමක් පමණක් වන අතර සමස්ත මුදලම පියවනු ලබන්නේ ‘දිට්වා’ වෙනුවෙන් වෙන් කරන ලද අතිරේක ඇස්තමේන්තුවේ භාවිත නොකළ ශේෂයන් හරහාය. මීට අමතරව, මධ්යම අධිවේගී මාර්ගයේ ගලගෙදර සහ රඹුක්කන පිවිසුම්වල වැඩකටයුතු 2028 වසර අවසානය වන විට නිම කිරීමට සැලසුම් කර ඇති බවත්, ඉදිරි මාස තුන ඇතුළත අධිවේගී මාර්ගවල විදුලි සැපයුම් කටයුතු ආරම්භ කරන බවත් මාර්ග සංවර්ධන අධිකාරිය මෙහිදී වැඩිදුරටත් සඳහන් කළේය.
