ශ්රී ලංකාවේ වැඩිම අපනයන ආදායමක් උපදවන සහ ආර්ථිකයේ මූලික කුළුණක් වන රෙදිපිළි හා ඇඟලුම් කර්මාන්තයේ අනාගත තරගකාරිත්වය ජය ගැනීමට නම් නවෝත්පාදනය, කාර්යක්ෂමතාව සහ නවීන තාක්ෂණය අත්යවශ්ය බව කර්මාන්ත හා ව්යවසායකත්ව සංවර්ධන අමාත්ය සුනිල් හඳුන්නෙත්ති මහතා පැවසීය.
අමාත්යවරයා මෙම අදහස් පළ කළේ අගෝස්තු 05 වන දින කොළඹ බණ්ඩාරනායක අනුස්මරණ ජාත්යන්තර සම්මන්ත්රණ ශාලාවේදී (BMICH) ආරම්භ වූ දකුණු ආසියාවේ ප්රමුඛතම ජාත්යන්තර රෙදිපිළි හා ඇඟලුම් තාක්ෂණික ප්රදර්ශනය වන ‘Intex – InMac Sri Lanka 2026’ ප්රදර්ශනය විවෘත කිරීමේ අවස්ථාවට එක්වෙමිනි. රටවල් 15කට අධික සංඛ්යාවකින් ප්රදර්ශකයන් 250කට වැඩි පිරිසකගේ සහභාගීත්වයෙන් අගෝස්තු 05 සිට 07 දක්වා පැවැත්වෙන මෙම ප්රදර්ශනය, ආයෝජන ආකර්ෂණය කර ගැනීමට මෙන්ම නව තාක්ෂණ හා දැනුම හුවමාරු කර ගැනීමට වැදගත් වේදිකාවක් වනු ඇති බව ඔහු සඳහන් කළේය.
එරාවුර් රෙදිපිළි උද්යානය සංවර්ධනය කිරීමට සහ ශ්රී ලංකා රෙදිපිළි හා ඇඟලුම් ආයතනය (SLITA) හරහා ක්ෂේත්රයට අවශ්ය මානව සම්පත නංවාලීමට රජය ඉදිරියේදී සැලකිය යුතු ආයෝජන සිදු කරන බවද අමාත්යවරයා අවධාරණය කළේය. මීට අමතරව, මෑතකදී ඉන්දියාවේ පැවති ‘Bharat Tex’ ප්රදර්ශනයේදී ඉන්දීය අමාත්යවරයා සමඟ නිදහස් වෙළෙඳ ගිවිසුම (FTA), ඇඟලුම් කෝටා සහ GSP+ සහන සම්බන්ධයෙන් සාකච්ඡා කළ බවද ඔහු වැඩිදුරටත් කියා සිටියේය.
