ඉන්දියාවේ බටහිර බෙංගාල ප්රාන්තයේ මුර්ෂිදාබාද් දිස්ත්රික්කයේ බෙල්ඩංගා ප්රදේශයේ 16 හැවිරිදි ඉක්බාල් නම් තරුණයෙකු මාසයකට ආසන්න කාලයක් තිස්සේ දිවා රෑ පොකුණුවල ගත කිරීම හේතුවෙන් ප්රදේශවාසීන් අතර දැඩි අවධානයක් සහ කනස්සල්ලක් ඇති වී තිබේ.
ඉක්බාල් පවසන්නේ ජලයෙන් පිටතට පැමිණි විට තම මුළු සිරුර පුරා දැවෙන ආකාරයේ වේදනාවක් දැනෙන බවත්, කිසියම් අද්භූත බලවේගයක් තමන්ව ආක්රමණය කරන බවක් හැඟෙන බවත්ය. එම හේතුවෙන් ඔහු උදෑසන සිට රාත්රිය දක්වා පොකුණුවල පාවෙමින් කාලය ගත කරන අතර, ඇතැම් අවස්ථාවල එක් ජල මූලාශ්රයකින් තවත් ජල මූලාශ්රයකටද මාරු වේ. ප්රදේශවාසීන් ඔහුට ආහාර ගෙනවිත් දෙන අතර, ඔහු එම ආහාරද පොකුණේ රැඳී සිටිමින්ම අනුභව කරයි.
දිගු කාලයක් ජලයේ රැඳී සිටීම හේතුවෙන් ඔහුගේ අත් සහ පාදවල සම සුදු පැහැයට හැරී ඇති අතර, ඔහුට සෙම්ප්රතිශ්යාව සහ කැස්ස වැනි රෝග ලක්ෂණද මතුව තිබේ. කොල්කටා නගරයේ වෛද්යවරුන් පෙන්වා දෙන්නේ දිගු වේලාවක් ජලයේ රැඳී සිටීම හේතුවෙන් සමේ සහ දිලීර ආසාදන මෙන්ම තවත් සෞඛ්ය ගැටලු ඇති විය හැකි බවයි. සමේ ස්වාභාවික ආරක්ෂිත ආවරණය දුර්වල වීම නිසා එය කැසීම, ඉරිතැලීම් සහ ආසාදනවලට පහසුවෙන් ලක්විය හැකි බව චර්ම රෝග විශේෂඥයෝ පෙන්වා දෙති. එබැවින් ඔහුට නිසි වෛද්ය පරීක්ෂාවක් මෙන්ම අවශ්ය නම් මානසික සෞඛ්ය තක්සේරුවක්ද සිදු කිරීම සුදුසු බව වෛද්යවරු සඳහන් කරති.
තම පුත්රයාගේ තත්ත්වය පිළිබඳව කනස්සල්ලට පත්ව සිටින දෙමාපියන් පවසන්නේ මීට පෙර ඔහුව රෝහලකට රැගෙන ගියද සැලකිය යුතු සුවයක් නොලැබුණු බවයි. දිගුකාලීන ප්රතිකාර සඳහා වැය වන මුදල් දැරීමට ආර්ථික අපහසුතා ඇති බැවින්, තම පුත්රයාට නිසි වෛද්ය ප්රතිකාර ලබාදීමට බලධාරීන් මැදිහත්වී උපකාර කරන ලෙස ඔවුහු ඉල්ලා සිටිති.
