“ක්ලීන් ශ්රී ලංකා” ජනාධිපති කාර්යසාධක බලකායේ සභාපති ලෙස කටයුතු කරන ජනාධිපති ලේකම් ආචාර්ය නන්දික සනත් කුමානායක මහතා සහ එම බලකායේ සාමාජිකයන් අතර හමුවක් ජනාධිපති කාර්යාලයේදී පැවැත්විණි.
මෙම හමුවේදී “ක්ලීන් ශ්රී ලංකා” වැඩසටහනේ වත්මන් ප්රගතිය මෙන්ම ඉදිරි සැලසුම් සම්බන්ධව දීර්ඝ ලෙස සාකච්ඡා කර තිබේ.
දිවයිනේ සියලුම පළාත් පාලන ආයතන කේන්ද්ර කරගෙන ක්රියාත්මක වන නව කසළ කළමනාකරණ වැඩසටහන පිළිබඳව සාමාජිකයන් දැනුවත් කිරීම සහ ඒ වෙනුවෙන් ජනාධිපති කාර්යාලය තුළ ව්යාපෘති කළමනාකරණ අංශයක් පිහිටුවීම කෙරෙහි මෙහිදී අවධානය යොමු විය.
තෝරාගත් නගර කිහිපයක් ආදර්ශවත් නගර බවට පත් කිරීම සහ කොළඹ මහනගර බල ප්රදේශය තුළ කසළ කළමනාකරණය, නගර අලංකරණය, ඇළ මාර්ග පිරිසිදු කිරීම, මලාපවහන පද්ධති නවීකරණය කිරීම සහ උද්යාන ප්රතිසංස්කරණය කිරීම සඳහා ව්යාපෘති කළමනාකරණ ඒකකයක් ස්ථාපිත කිරීමේ අවශ්යතාව දැඩි ලෙස අවධාරණය කෙරිණි.
මීට අමතරව, ක්ලීන් ශ්රී ලංකා වැඩසටහනට අයත් ප්රධාන කුලුනු තුනෙන්, දෙකක් වන සමාජීය සහ ආචාර ධාර්මික කුලුනු සඳහා වැඩි අවධානයක් යොමු කරමින් ඉදිරි වසරේ කටයුතු සැලසුම් කළ යුතු බවටද සාකච්ඡා විය.
මෙම අවස්ථාවට “ක්ලීන් ශ්රී ලංකා” කාර්යසාධක බලකායේ ලේකම් සහ කැඳවුම්කරු ජනාධිපති ජ්යෙෂ්ඨ අතිරේක ලේකම් රසල් අපොන්සු, ජනාධිපති අතිරේක ලේකම් එස්.පී.සී. සුගීෂ්වර යන මහත්වරුන් ඇතුළු ත්රිවිධ හමුදාපතිවරුන් සහ ජ්යෙෂ්ඨ රාජ්ය නිලධාරীහු පිරිසක් එක්ව සිටියහ.
