පේරාදෙණිය විශ්වවිද්යාලයේ විනයාරක්ෂක නිලධාරියෙකු වන මහේෂ් අබේවික්රම නැමැත්තා මහජන සම්බන්ධතා නිලධාරී (PRO) ලෙස පෙනී සිටිමින් සිය නිත්ය තනතුර වන විනයාරක්ෂක නිලධාරී තනතුරේ වගකීම් පැහැර හැර තිබෙන බව විශ්වවිද්යාල සේවකයෝ පවසති.
විනයාරක්ෂක නිලධාරියෙකු සතුව විශාල වගකීම් ප්රමාණයක් පවතින අතර, විශ්වවිද්යාල සිසුන්ගේ විනය පවත්වාගැනීම, නවක වධයට සහ මත්ද්රව්ය ව්යාප්තියට එරෙහිව කටයුතු කිරීම ආදී බරපතල කාර්යයන් ඒ අතර වේ. විශේෂයෙන්ම සිසුන් 14,000 කට ආසන්න සංඛ්යාවක් අධ්යාපනය ලබන, පීඨ 09 කින් සමන්විත සුවිශාල පරිශ්රයක් සහිත පේරාදෙණිය විශ්වවිද්යාලයේ එම කටයුතු සඳහා සිටින්නේ විනයාරක්ෂකයින් 11 දෙනෙකු පමණි. එබැවින් පවතින සේවක හිඟය හමුවේ මෙම වගකීම්වල බරපතලකම තවත් වැඩි වී ඇත.
එවන් දුෂ්කර තත්ත්වයක් යටතේ වුවද පේරාදෙණිය විශ්වවිද්යාලයේ අනෙකුත් විනයාරක්ෂක නිලධාරීන් පසුගිය කාලසීමාවේදී නවක වධය වැළැක්වීමට සහ මත්ද්රව්ය ව්යාප්තියට එරෙහිව ප්රශංසනීය කාර්යභාරයක් ඉටුකර තිබෙන බව විශ්වවිද්යාල ප්රජාව පෙන්වා දෙති.
එහෙත් මහේෂ් අබේවික්රම නැමැත්තා තමන් මහජන සම්බන්ධතා නිලධාරී බව පවසමින් සහ උපකුලපතිවරයාගේ රාජකාරී පවතින බව කියමින් මෙම විනයාරක්ෂක රාජකාරිවලින් මගහැර සිටින බවට චෝදනා එල්ල වේ. විශේෂයෙන්ම රාත්රී රාජකාරී සඳහා සහ මත්ද්රව්ය අත්අඩංගුවට ගැනීමේ වැටලීම් සඳහා ඔහු සහභාගී නොවන බව සේවකයෝ සඳහන් කරති.
ආසන්න කාලසීමාවේදී සිදුවූ නවක වධ සිදුවීම් සම්බන්ධ විමර්ශනවලට හෝ මත්ද්රව්ය අත්අඩංගුවට ගැනීමේ මෙහෙයුම් කිසිවකට ඔහු සහභාගී වී නොමැති වීමෙන් මෙම තත්ත්වය තහවුරු වන බවද විශ්වවිද්යාල අභ්යන්තර ආරංචි මාර්ග පවසයි.
