ශ්රී ලංකාවේ පරම්පරා ගණනාවක් පුරා පැවත එන දේශීය වෛද්ය දැනුම, වෛද්ය පරම්පරා සහ ප්රතිකාර ක්රම විධිමත්ව ලේඛනගත කර අනාගතය වෙනුවෙන් සුරක්ෂිත කිරීමේ පුළුල් ජාතික වැඩපිළිවෙළක් ක්රියාවට නංවා තිබේ. ඒ යටතේ TMK පරිගණක මෘදුකාංගය එළිදැක්වීම, බණ්ඩාරනායක අනුස්මරණ ආයුර්වේද පර්යේෂණායතනය සතුව පවතින අනුලේඛීය වටිනාකමකින් යුත් පුස්කොළ පොත් කාණ්ඩ 10ක් මහජන ප්රදර්ශනයට එක් කිරීම සහ පෞරාණික කෞතුක භාණ්ඩ ඇතුළත් විශේෂ කෞතුකාගාරයක් විවෘත කිරීම පසුගියදා උත්සවාකාරයෙන් සිදු කෙරිණි. මෙතෙක් පුද්ගල මතකය සහ සීමිත ලිඛිත මූලාශ්ර මත පමණක් රඳා පැවති වටිනා වෛද්ය තොරතුරු නවීන තාක්ෂණය ඔස්සේ ආරක්ෂා කරගැනීම මෙම ව්යාපෘතියේ මූලික අරමුණ වී ඇත.
මෙම ව්යාපෘතියේ තවත් එක් වැදගත් පියවරක් ලෙස දිවයින පුරා සිටින දේශීය වෛද්යවරුන් පිළිබඳ නිල සංගණනයක් පවත්වා, ඔවුන් සතු පරම්පරාගත වෛද්ය දැනුම හා රහස් පරිගණකගත කිරීමට නියමිතය. එම දත්ත සමුදාය පදනම් කරගනිමින් ශ්රී ලංකාවේ පාරම්පරික වෛද්ය පරම්පරා සහ ඒවාට ආවේණික සම්ප්රදායන් ඇතුළත් ජාතික ලේඛනයක් සහ අන්තර්ජාල පද්ධතියක් ඉදිරියේදී ස්ථාපිත කිරීමට සැලසුම් කර තිබේ. ආයුර්වේද කොමසාරිස් ජනරාල් දීප්ති සුමනසේන මහත්මියගේ ප්රධානත්වයෙන් සහ බණ්ඩාරනායක අනුස්මරණ ආයුර්වේද පර්යේෂණායතනයේ අධ්යක්ෂ වෛද්ය ඒ.එස්.සී. පීරිස් මහත්මිය ඇතුළු සම්භාවනීය පිරිසකගේ සහභාගීත්වයෙන් මෙම උත්සවය පැවැත්වුණු අතර, මෙරට වෛද්ය උරුමය රැක ගැනීමට ගත් මෙම ඓතිහාසික පියවරට බොහෝ පාර්ශ්වයන්ගෙන් පැසසුම් හිමිවෙමින් පවතී.
