වතුකරයේ ජනතාවට සුන්දර සහ පහසුකම්වලින් පිරි ජීවිතයක් ලබා දීම සඳහා අවශ්ය සියලු මූලික පහසුකම් සැපයීමට වත්මන් ආණ්ඩුව විශේෂ සැලසුම් සකස් කරමින් සිටින බව වැවිලි සහ ප්රජා යටිමට්ටම් පහසුකම් නියෝජ්ය අමාත්ය සුන්දරලිං ගම් ප්රදීප් මහතා ප්රකාශ කර තිබේ. පසුගිය කාලසීමාවේදී විවිධ අමාත්යවරුන්ගේ අකටයුතුකම් හේතුවෙන් වතු සේවකයන්ට හිමි විය යුතු සුබසාධන අරමුදල් නිසි ලෙස ක්රියාත්මක නොවූ බවත්, පාසල් දරුවන්ගේ නම් පවා භාවිතා කරමින් එම අරමුදල්වලින් මිලියන ගණනින් මුදල් අවභාවිත කර ඇති බවත් හෙතෙම පෙන්වා දුන්නේය. කෙසේ වෙතත්, ඉදිරියේදී කම්කරු සේවකයන්ට ලැබිය යුතු සුබසාධන ප්රතිලාභ කිසිදු බාධාවකින් තොරව අඛණ්ඩව ලබා දීමට කටයුතු කරන බව ඔහු අවධාරණය කළේය.
මීට අමතරව, 2023 වසරේදී බදුල්ල දිස්ත්රික්කයේ කබරකඩ ප්රදේශයේ සිදු වූ ආපදා තත්ත්වයක් හේතුවෙන් කර්මාන්ත ශාලාවක අසරණව වාසය කළ පවුල් 500ක් සඳහා ස්ථිර නිවාස ඉදිකර දීමට වත්මන් ආණ්ඩුව මේ වන විට පියවර ගෙන ඇති බව නියෝජ්ය ඇමැතිවරයා සඳහන් කළේය. එම එක් නිවසක් සඳහා රුපියල් ලක්ෂ 20ක මුදලක් සහ යටිතල පහසුකම් සංවර්ධනය වෙනුවෙන් ලක්ෂ 4ක මුදලක් වෙන් කර ඇති බව ඔහු පැවසීය. වතුකරයේ දරුවන්ගේ අධ්යාපන මට්ටම ඉහළ නැංවීම සඳහා පවතින ගුරු සහ සම්පත් හිඟයට කඩිනම් විසඳුම් ලබා දීමටත්, නිසි ලෙස නඩත්තු නොකිරීම නිසා වසා දමා තිබෙන වතුකරයේ රෝහල් යළි විවෘත කර ජනතා අයිතියට පත් කිරීමටත් පුළුල් වැඩපිළිවෙළක් ක්රියාත්මක කරමින් පවතින බව හෙතෙම වැඩිදුරටත් කියා සිටියේය.
