ශ්‍රී ලංකා යුද්ධ හමුදාපති ලුතිනන් ජෙනරාල් නිලන්ත ප්‍රේමරත්න පරම වීර විභූෂණ සම්මානයෙන් පිදුම් ලැබූ දිවංගත කෝප්‍රල් එස්.වී.ඒ.එම්. පුෂ්පමාල් රණවිරුවාගේ ගිරිතලේ, සරණසිරිගම පිහිටි නිවස වෙත ගොස් මව්පියන් හමුවී ඔවුන් වෙත සිය ගෞරවය පුද කළේය.
2 වන කමාන්ඩෝ රෙජිමේන්තුවේ සාමාජිකයෙකු වූ දිවංගත කෝප්‍රල් පුෂ්පමාල් රණවිරුවා, 2009 අප්‍රේල් මස 21 දින පුදුමාතලන් ප්‍රදේශයේ පැවති මානුෂීය මෙහෙයුමකදී සිවිල් ජනතාව මුදාගැනීමකට සහභාගි වෙමින් මාතෘභූමිය වෙනුවෙන් සිය ජීවිතය පරිත්‍යාගය සිදු කළේය. ජීවිතක්ෂයට පත්වන විට ඔහු 22 වැනි වියේ පසුවූ අතර, ඔහු විසින් පෙන්වූ අසමසම වීරත්වය හා උදාර පරිත්‍යාගය අගය කරමින් මරණින් පසු ශ්‍රී ලංකාවේ ඉහළම වීර වික්‍රම සම්මානය වන පරම වීර විභූෂණ සම්මානයෙන් සහ පූර්ණ භූමි පදක්කමෙන් පිදුම් ලැබීය.
මෙම අවස්ථාවේදී යුද්ධ හමුදාධිපතිවරයා දිවංගත රණවිරුවාගේ පියා වන එස්.වී.ජී. විජේරත්න මහතා සහ මව වන කේ.වී. අමරාවතී මැණිකේ මහත්මිය හට සිය ගෞරවය පුද කරමින් මූල්‍යමය පරිත්‍යාගයක්ද සිදු කළේය.
