පාකිස්ථානයේ හිටපු අග්‍රාමාත්‍ය ඉම්රාන් ඛාන් පෞද්ගලික රෝහලකට ඇතුළත් කරන ලෙස ශ්‍රේෂ්ඨාධිකරණය කර තිබූ නියෝග උල්ලංඝනය කරමින් ඔහුව රජයේ රෝහලකට ඇතුළත් කිරීමට එරෙහිව ෂෙබාස් ෂරීෆ් රජයට එරෙහිව අධිකරණයට අපහාස කිරීමේ පෙත්සමක් ගොනු කර තිබේ.
වෛද්‍යවරුන් විසින් හෘද රෝගී සංකූලතා ඇතිවීමේ දැඩි අවදානමක් පවතින බවට අනතුරු අඟවා තිබියදී, 73 හැවිරිදි වියේ පසුවන ඉම්රාන් ඛාන්ට අවශ්‍ය කරන ‘CTA’ පරීක්ෂණය පකිස්ථාන වෛද්‍ය විද්‍යා ආයතනය තුළ ක්‍රියාකාරී ස්කෑනර් යන්ත්‍ර තිබියදීත් ලබාදීමට කටයුතු නොකිරීම ඔහුගේ පක්ෂය වන ‘පාකිස්ථාන් තෙහ්රීක්-ඊ-ඉන්සාෆ්’ (PTI) දැඩි ලෙස හෙළා දැක ඇත. අග්‍රාමාත්‍යවරයා, නීති අමාත්‍යවරයා සහ තොරතුරු අමාත්‍යවරයා ඇතුළු උසස් රාජ්‍ය නිලධාරීන් ඉලක්ක කර ගනිමින් ගොනු කර ඇති මෙම පෙත්සම හරහා, වහාම ඔහුව ‘ෂිෆා ඉන්ටර්නැෂනල්’ පෞද්ගලික රෝහල වෙත මාරු කර අදාළ වෛද්‍ය පරීක්ෂණ සිදු කරන ලෙස ඉල්ලා තිබේ.
මෙම අර්බුදකාරී තත්ත්වය පාකිස්ථානයේ වත්මන් දේශපාලන අස්ථාවරත්වය තවත් තීව්‍ර කිරීමට හේතු වී ඇති අතර, අධිකරණ නියෝග සහ රජයේ ක්‍රියාමාර්ග අතර මතුව ඇති මෙම ගැටුම අගමැති ෂෙබාස් ෂරීෆ්ගේ පරිපාලනයට බලවත් දේශපාලන පීඩනයක් එල්ල කරනු ඇත. ඉදිරියේදී අධිකරණය විසින් මෙම පෙත්සම සම්බන්ධයෙන් ලබාදෙන තීන්දුව මත පාකිස්ථානයේ දේශපාලන බලතුලනය සහ ආණ්ඩුක්‍රම ව්‍යවස්ථාමය අර්බුදයේ ස්වභාවය සම්පූර්ණයෙන්ම තීරණය වනු ඇත.
