රාජ්ය සේවයේ වගකීම් පැහැර හැරීම, දූෂිත නිලධාරීන්ට අනුබල දීම සහ දේශපාලන බලපෑම් එල්ල කිරීමේ චෝදනා මත ශ්රී ලංකා කබඩි සම්මේලනය විසින් ක්රීඩා අමාත්යාංශයේ ඉහළ පෙළේ නිලධාරීන් තිදෙනෙකුට එරෙහිව පොලිස් අපරාධ විමර්ශන ඒකකයට සහ අල්ලස් හෝ දූෂණ චෝදනා විමර්ශන කොමිෂන් සභාවට පැමිණිලි කර තිබේ.
මෙම පැමිණිල්ලට ලක්ව ඇත්තේ ක්රීඩා අමාත්යාංශයේ අධ්යක්ෂ ජනරාල්වරයා, ජාතික ක්රීඩා සංගම් භාර නිලධාරියා සහ ක්රීඩා ඇමැතිවරයාගේ පෞද්ගලික සම්බන්ධිකරණ ලේකම්වරයෙකි. කබඩි සම්මේලනයේ විධායක සභික හා විනය කමිටු සභාපති සනත් සමරසේකර මහතා ඇතුළු නියෝජිතයන් පිරිසක් විසින් මෙම පැමිණිලි ඉදිරිපත් කරන ලදී.
පසුගිය මැයි 25 වන දින පැවැති නිලවරණයෙන් පත් වූ සභාපති අමිල උදයකාන්ත ලක්ප්රිය මහතා විනය පරීක්ෂණයකින් පසු ධුරයෙන් ඉවත් කර තිබියදී, අමාත්යාංශ නිලධාරීන් විසින් ඔහු තවදුරටත් සම්මේලනයේ සභාපතිවරයා ලෙස පිළිගැනීමට කටයුතු කිරීම මෙම ගැටුමට මුල් වී ඇත. අගෝස්තු 5 වන දින යාපනයේදී පැවැති විශේෂ මහ සභා රැස්වීමකදී සභාපතිවරයා නිල වශයෙන් ඉවත් කර තිබියදී, අමාත්යාංශය එය නොසලකා හරිමින් කටයුතු කරන බවත්, ක්රීඩා අධ්යක්ෂ ජනරාල්වරයා කබඩි සම්මේලනය යවන කිසිදු ලිපියකට ප්රතිචාර නොදැක්වීම සහ අමාත්යාංශ බලපෑම් සිදු කරන බවත් සම්මේලනය චෝදනා කරයි.
දිස්ත්රික් කබඩි සම්මේලන 23කින් 15ක සහ විධායක සභාවේ 17 දෙනෙකුගෙන් 11 දෙනෙකුගේ ලිඛිත සහය වත්මන් විධායක සභාව වෙත ලැබී ඇති බැවින්, රටේ නිත්යානුකූල කබඩි පරිපාලන ඒකකය ලෙස කටයුතු කිරීමේ හිමිකම තමන් සතු බව ඔවුන් අවධාරණය කර සිටිති.
